Me një ceremoni të bukur është hapur Kampionati Evropian U19 për hendbolliste, që deri më 16 korrik mbahet në Prishtinë.
Kampionatin Evropian të hapur e shpalli presidenti i FHK-së, Eugen Saraçini.
Në ceremoni prezent ishin edhe zëvendësministrja e Kulturës, Rinisë dhe Sportit, Daulina Osmani, drejtori për sport në Komunën e Prishtinës, Granit Rugova dhe përfaqësuesi i EHF-së, Pedro Sequeira.
Saraçini ka falenderuar pjesëmarrësit në emër të FHK-së dhe partnerëve të saj. Ai u ka dëshiruar ekipeve kombëtare mirëseardhje në Kosovë.
"Shpresojmë të kemi garë të bukur dhe që kohën këtu ta shfrytëzoni për shoqërim me njëri-tjetrin", ka thënë Saraçini.
Zv.ministrja Osmani po ashtu u ka dëshiruar mirëseardhje ekipeve.
"Është nder dhe kënaqësi që Prishtina dhe Kosova janë shndërruar në qendër të organizimeve ndërkombëtare sportive.
E përgëzoj FHK-në për organizimin e shkëlqyer", ka thënë Osmani duke uruar që Kosova të paraqitet me sukses.
FHK-në e ka përgëzuar edhe përfaqësuesi i EHF- së, Sequeira.
Ceremonia hapëse ka përmbajtur edhe pikë artistike dhe shfaqje të flamujve të vendeve pjesëmarrëse.
