Dëshmitari i Tom Doshit, Petrit Çinari padit për shpifje kreun e grupit të LSI-së, Petrit Vasilin. Çinari mësohet se dorëzoi sot në gjykatë kallëzimin penal ndaj Vasilit.
Shkak për padinë është bërë deklarata më 11 mars e Vasilit, i cili u shpreh se deputeti Doshi i ka bërë bashkëshortes së Petrit Çinarit një apartament dhuratë.
Në një deklaratë për media, Vasili u shpreh se apartamenti 80 metra katrorë iu dhurua gruas së Çinarit si shpërblim për një dëshmi të rreme për vrasjen e deputetit, para se Doshi të bënte akuzat.
Sipas një deklarate që Doshi kishte bërë më herët në Facebook, Petrit Çinari, një ish-oficer i specializuar si snajper, është porositur nga babai i kryeparlamentarit Meta për ta vrarë.
Çinari është një tjetër dëshmitar i sjellë në skenë nga deputeti Doshi, që sipas tij vërteton versionin që Ilir Meta ka dashur që ta vrasë bashkë me deputetin demokrat Mhill Fufi.
