Selektori i Kombëtares së Kosovës, Agron Shabani, po punon me zell të shtuar me qëllim që të përgatitë ekipin për sfidat e parakualifikueseve për Kampionatin Evropian në hendboll.
Rrjedha e përgatitjeve po shkon mjaft mirë me vashat në Qendrën e Rinisë dhe të Sportit në Prishtinë.
“Kombëtarja e Kosovës po vazhdon përgatitjet për ndeshjet e javës së ardhshme. Prej 3 deri më 5 qershor në arenën e njëjtë luajmë me Qipron, Luksemburgun e Portugalinë në kualifikimet për Euro 2022.
Selektori Agron Shabani me trajnerët Faruk Shala e Valbona Rudaku po punojnë në aspektin taktik me lojtaret.
Me ardhjen e motrave Hajdari, Marigonës e Arlindës, Fitore Aliut dhe Pashke Markut, ekipi është thuajse i kompletuar.
Atmosfera në Kombëtare është shumë e mirë kurse lojtaret dhe shtabi teknik janë të vetëdijshëm për rëndësinë e ndeshjeve”, thuhet në njoftimin FHK-së.
