Analisti politik, Valon Syla, ka thënë se dialogu mes Kosovës dhe Serbisë është shtyrë edhe më fuqishëm në Samitin e Sofjes, ndërkaq për këtë samit ka thënë se ka shërbyer edhe si një kundërpërgjigje e fuqive evropiane ndaj ndikimit rus.
“Dialogu Prishtinë-Beograd nuk po flitet se kur duhet të përfundojë, por po flitet me një agjendë ku përmenden muajt dhe jo vitet, e që mendoj që është një risi që shtyhet nga Sofja më fuqishëm”, ka thënë Syla në Zonën e Debatit.
“Është një agjendë shumë më e përshpejtuar e BE-së”, ka thënë ai.
Ai mendon se kjo është edhe si kundërpërgjigje e fuqive evropiane ndaj Rusisë shkaku i lëvizjeve të fundit dhe prishjeve të marrëdhënieve me Moskën.
“Mendoj që sot është heshtur kjo influenca ruse, dhe i është dhënë një përgjigje më e fuqishme nga Brukseli Zyrtar”.
Syla ka thënë po ashtu se është i dukshëm një përafrim i Gjermanisë me presidentin Hashim Thaçi, për të cilin ai tha se nuk ishte bash i dashur për gjermanët.
“Para katër-pesë muajsh, nuk mund të paramendohej që zonja Merkel do ta vendoste Hashim Thaçin në faqen e saj private. Do të ishte pothuajse e paimagjinueshme, dhe ky mesazh vjen nga Sofja”, tha Syla pasi sot kancelaria gjermane, Angela Merkel, kishte postuar në profilin zyrtar në Instagram një fotografi duke biseduar me presidentin kosovar, Hashim Thaçi.
