Pas një pauze prej një muaji, automobilistët e Kosovës sërish do të kthehen në shtigjet e garave, madje shtatori do të jetë i stërmbushur me aktivitetet e tyre.
Në këtë fundjavë, ata do të garojnë në garën malore, në Pousko në afërsi të Prizrenit. Është e sigurt se të gjithë garuesit do ta japin maksimumin me synimin për të inkasuar pikë të reja, ndërkohë që edhe interesimi i dashamirëve të automobilizmit duket se është mjaft i madh.
Është kjo gara e pestë në disiplinën malore, ndërsa e nënta në përgjithësi në kampionatin e sivjetmë të Kosovës. Organizator i garës së kësaj fundjave ësthtë Federata e Auto Sportit e Kosovës në bashkëpunim me Auto Klubin Prizreni.
Garuesit, të cilët edhe më parë janë sprovuar në shtegun e Pouskos shprehen optimistë për një garë atraktive, gjë të cilën edhe e mundëson ky shteg.
Pas garës në Pousko, Kampionati i Kosovës vazhdon në Kullë, pastaj më 19 e 20 shtator, nëntë garues tanë do të jenë në Buzet të Kroacisë, për të vazhduar në fundjavën e fundit të shtatorit me garën e kartingut që do të zhvillohet në Prizren.