Kryeministri Edi Rama ka thirrur në një takim në Kryeministri ministrat socialistë të kabinetit.
Takimi vjen vetëm një ditë pasi Partia Demokratike propozoi caktimin e një kryeministri jashtë politikës për të udhëhequr qeverinë teknike në zgjedhje. Burimet bëjnë me dije se bisedimet mes palëve kanë vazhduar natën vonë dhe pritet të vijojnë edhe sot.
Mbledhja e ministrave socialistë vjen vetëm pak para mbajtjes së seancës së Kuvendit, ku pritet të ketë diskutime rreth krizës politike.
Rendi i ditës në Kuvend
Në rendin e ditës janë diskutimi i shtesave dhe ndryshimeve në ligjin “Për deklarimin dhe kontrollin e pasurive, të detyrimeve financiare të të zgjedhurve dhe të disa nëpunësve publikë”, ndryshimet në ligjin “Për masat kundër financimit të terrorizmit” si dhe ato në ligjin “Për parandalimin e pastrimit të parave dhe financimit të terrorizmit”.
Në ndryshim nga 7 ligjet e miratuara një javë më parë të cilat kërkonin shumicë të cilësuar prej 84 votash për miratim, projektligjet e sotme miratohen me shumicë të thjeshtë.
