Komisioni i posaçëm për reformën në drejtësi pritet të mblidhet të hënën për tu njohur me propozimet që grupi i ekspertëve të nivelit të lartë do të ketë rreth opinioneve që misionet EURALIUS dhe OPDAT, dhanë për vërejtjet e Partisë Demokratike ndaj ligjit “për rivlerësimin e gjyqtarëve dhe prokurorëve”, i njohur ndryshe si vetingu.
Pas mbledhjes të së mërkurës, ekspertët e EURALIUS bënë të ditur se kishin rënë dakord për disa vërejtje të opozitës, qe lidheshin me rishikimin e disa termave apo riformulime të neneve të caktuara, por ata vlerësuan se do t’i qëndrojnë tekstit ekzistues.
Mbledhja e sotme do të ketë në agjendë edhe ligjin “për organizimin e gjyqësorit dhe strukturën e posaçme antikorrupsion”.
Pritet që në mbledhjen e sotme të komisionit të diskutohet dhe për datën kur do të mblidhet seanca plenare, për të votuar ligjin e Vetingut.
Mungesa e këtij ligji e bëri të pamundur hedhjen e shortit për emërimin e anëtarëve të Këshillit të Emërimeve në Drejtësi, institucioni i parë që do të duhej të ngrihej me miratimin e reformës kushtetuese, më 21 korrik.
Të shtunën, kryetari i Kuvendit Ilir Meta njoftoi për thirrjen të martën të Konferencës së Kryetarëve, për të vendosur datat e thirrjes së seancave, ku do duhet të miratohen disa nga 7 projektligjet mbështetëse të paketës së reformës në drejtësi.