Kryetari i Lëvizjes Socialiste për Integrim, z. Ilir Meta, së bashku me kandidatin e “Aleancës për Shqipërinë Evropiane” për Bashkinë e Vorës, z. Luan Sallaku zhvilloi një takim me banorë të Fushë Prezës. Në këtë takim z. Meta ishte i shoqëruar nga Ministri i Bujqësisë, Zhvillimit Rural dhe Administrimit të Ujërave, z. Edmond Panariti si edhe nga Zv.Ministrja e Arsimit dhe Sportit, znj. Nora Malaj.
Duke folur përpara banorëve të Fushë Prezës, z. Meta theksoi se në këtë njësi të re vendore një prioritet parësor do të jetë punësimi pasi është një zonë që ka shumë biznese të mëdha që operojnë në të dhe për rrjedhojë, duhen ndjekur politika të reja punësimi për banorët e Bashkisë së Vorës. “Punësim për të gjithë ata që duan të punojnë, sipas shkollës, sipas profesionit. Kjo është baza e premtimit tonë. Ky është kryqëzimi i të gjithë rrugëve të Shqipërisë, edhe të Shqipërisë me rajonin. Kjo është zona më e preferuar për çdo investim, për industri, për qendra grumbullimi, për qendra përpunimi, sepse është kosto më e ulët”,- tha z. Meta
Duke qenë se Bashkia e re e Vorës është në qendër të rrugëve që lidhin rajone të ndryshme të vendit, z. Meta theksoi se në këtë njësi vendore duhet të ndërtohen qendra grumbullimi dhe përpunimi të produkteve bujqësore në mënyrë që të kthehet në një gjenerim të ardhurash dhe punësimi. “Vijnë prodhime nga e gjithë Shqipëria dhe ikin kudo ku ka treg dhe këtu nga pikëpamja strategjike duhet të jetë një vend me qendra të tilla, jo thjesht për të grumbulluar prodhimet e Prezës dhe të Vorës, por për të grumbulluar prodhimin nga e gjithë Shqipëria. Dhe natyrisht, përderisa do të bëhet grumbullimi këtu, do të bëhet edhe qendra e përpunimit”, – shtoi z. Meta.
“Edhe qeveria e re ka prioritet numër një bujqësinë dhe ushqimin. Skema e re për të shumëfishuar investimet prodhuese dhe në fushën e përpunimit në bujqësi, në blegtori, në fushën e ushqimit do të jetë një revolucion i vërtetë sa i takon rritjes së interesit të gjithë prodhuesve. Sepse më të në fund produktet tona, të cilat kanë qenë shumë të njohura para 25 vjetësh në të gjithë tregjet evropiane, kanë filluar dhe kërkohen nga të gjitha tregjet e huaja, por sasia nuk është e atyre përmasave ende për t’i zotëruar këto tregje dhe kuptohet edhe interesi nuk është ende kaq i lartë. Ndaj me këtë politikë të re të qeverisë, të Ministrisë së Bujqësisë, unë jam i bindur se Vora do të kthehet në një qendër të fuqishme të zhvillimit”, – theksoi Lideri i LSI-së.
Duke folur për arsimin profesional, z. Meta theksoi se ky do të jetë një prioritet për Vorën në mënyrë që të rinjtë e Bashkisë së re të kenë mundësi që të formohen profesionalisht. “Do të hapim një shkollë profesionale në bashkinë e re të Vorës në mënyrë, që ato profesione kryesore që janë baza e zhvillimit të kësaj zone, t’u krijojmë mundësinë të rinjve dhe fëmijëve që të edukohen dhe që të formohen dhe do të bëjmë kurse të formimit profesion me qëllim përgatitjen e të rinjve për tregun e punës, për të gjetur punën dhe për të ndërtuar një të ardhme të sigurt përmes punës”, – tha z. Meta.
Krahas kësaj, z. Meta shprehu bindjen e tij se Bashkia e re e Vorës do të ndjek dhe një filozofi tjetër transparence me qytetarët pasi është një njësi vendore që gjeneron shumë të ardhura nga bizneset dhe për këtë nevojitet në transparencë e plotë në fondet që administron. “Gjëja e parë që do të bëhet këtu do të ketë transparencë nga Kryetari i ri i Bashkisë, nga Këshilli i ri i Bashkisë. Transparencë e të gjithë të ardhurave, si krijohen, sa taksa krijohen nga taksat e banorëve, sa të ardhura krijohen nga bizneset që janë në territorin e
Bashkisë, sa të ardhura merr nga qeveria, nga buxheti qendror dhe shpenzimet. Dhe investimet dhe të gjitha këto të diskutohen përpara se të miratohet buxheti nga këshilli i ri i Bashkisë, do të bisedohet me komunitetin. Dhe ky është detyrimi i parë i çdo kryetari bashkie dhe unë jam i bindur se kryetari i ri i Bashkisë, z. Luan Sallaku gjënë e parë që do të bëj do të jetë pikërisht kjo, transparencë të plotë për të ardhurat e Bashkisë së re, për investimet dhe shpenzimet e Bashkisë së re. Kjo është e domosdoshme për të krijuar një raport besimi dhe transparence”, – u shpreh z. Meta.
Z. Meta theksoi gjithashtu se në Vorë do të ndiqet një politikë e re edhe për të rinjtë në ndërtimin e qendrave sportive dhe në ambiente për të zhvilluar talentet e të rinjve të Bashkisë së re. “Për të rinjtë është një mundësi e shkëlqyer për t’i dhënë cilësi tjetër jetës së tyre me kënde sportive, me ambiente për të zhvilluar talentin e tyre në kulturë, në art në çdo gjë tjetër dhe shumë aspekte të tjera”,- tha z. Meta.
Kandidati i Aleancës për Shqipërinë Evropiane, z. Luan Sallaku, duke cilësuar punësimin si një nga problem kryesore të të rinjve të Vorës, theksoi se pas 21 qershorit do të ngrihen qendra të formimit profesion në mënyrë që papunësia tek të rinjtë të minimizohet.
“Në bashkinë e re do të kemi disa zyra ku do të mundësojmë punësimin e gjithë të rinjve, pasi sot janë një problem i madh për familjet tuaja dhe ndikojnë në buxhetin familjar. Do të hapim dhe një shkollë profesionale ku shumë student nuk kanë mundësi studimi ku ato do të marrin dijet e duhura sipas profesioneve të caktuara”, – tha z. Sallaku.
Ministri i Bujqësisë, Zhvillimit Rural dhe Administrimit të Ujërave, z. Edmond Panariti teksa deklaroi se qeveria do të jap mbështetjen maksimale për zhvillimin bujqësor të zonës si edhe në pastrimin e kanaleve kullues dhe vaditës të tokave bujqësore. Ministri u shpreh se pas 21 qershorit do të marrë fund edhe procesi i certifikimit të pronës. Sipas z. Panariti, kjo është një plagë e hapur e cila do të shërohet nga kryetari i ri i Bashkisë së Vorës, z. Luan Sallaku.
“Synimi jonë është të mbyllim kalvarin e certifikatave të tokës. Është një problem, një plagë e hapur në të gjithë këtë zonë, ky është angazhimi i parë që kryetari i ardhshëm i bashkisë do të jetë në atë zyrë, procesin e certifikimin e pronës tuaj do të çojë deri në fund”, – tha z. Panariti.
