Pas deklaratës së ministrit të Brendshëm, Saimir Tahiri që implikonte në “çështjen Doshi” edhe kreun e PR, ka qenë ky i fundit, Fatmir Mediu që ka dalë në konferencë ku ka akuzuar qeverinë se është duke u munduar të manipulojë opinionin publik.
Mediu ka sqaruar se Fatjon Skënderi ka qenë shofer i Partisë Republikane nga viti 1991 deri në vitin 1993 dhe më pas nuk ka pasur të bëjë me këtë parti.
Kreu i PR-së, pyet Tahirin se pse nuk e kishte arrestuar më parë killerin e pretenduar.
“Qeveria pas deklaratës së Tom Doshit është përpjekur për të manipuluar opinionin publik.
Atë që nuk e bëri për 6 muaj, pretendon se e ka bërë për 2 ditë.
Kjo është sjellja e ish-Sigurimit.
Në mënyrë të paturpshme ministri i Brendshëm, Saimir Tahiri donte që të lidhte dhe emrin tim.
Fatjon Skënderi ka qenë një shofer i PR-së, nga viti 1991-1993 dhe është larguar në këtë vit.
Unë kam shkuar në Partinë Republikane në vitin 1992 dhe nga viti 1991 e deri në vitin 1998 kryetar i PR-së ka qenë Sabri Godo.
Deklarata e Saimir Tahirit janë vetëm për të manipuluar opinionin publik.
Tani unë kam dy pyetje për Tahirin:
Pse ministri Tahiri dhe qeveria dalin sot pas 6 muajsh bëjnë të ditur, pse janë ulur me njerëz, killerin e pretenduar?
Pse Saimir Tahiri nuk e ka arrestuar killerin e pretenduar siç ka bërë tani pas 6 muajsh?
Ky shtet ka marrë fund nga mënyra si funksionon”, tha gjatë konferencës për median, kreu i PR-së, Fatmir Mediu.
