Kryetari i grupit parlamentar të PD-së, Edi Paloka, tha se të huajt duhet të japin garanci për marrëveshjen e komisionit hetimor mes opozitës dhe mazhorancës. “Garancia kërkohet nga këta, jo nga Rama. Unë në fakt nuk kam asnjë besim se edhe sikur të nënshkruhet një marrëveshje e tillë, Rama do t’i qëndrojë, sepse e ka treguar me kohë se marrëveshjet nuk i zbaton”, thotë Paloka.
Ai shpjegoi se e vetmja gjë që opozita kërkon është që kjo mazhorancë të zbatojë Kushtetutën e këtij vendi, ligjet, vendimet e gjykatave të këtij vendi, të gjitha të shkelura nga kjo mazhorancë. Pyetjes se a do të kthehet opozita në Kuvend pa u plotësuar kushtet e vëna edhe nëse i rrezikohet djegia e mandateve, Paloka përgjigjet shkoqur:
“Mbase dikush mendon se do të vijë 6-mujori dhe këta do detyrohet të futen, se do të humbin mandatet! Atëherë do të jetë fundi i gjithçkaje. Ai do të jetë momenti kur praktikisht ky vend nuk do të ketë më opozitë dhe shqiptarët do të duhet të luftojnë për të rikthyer demokracinë në Shqipëri”.
