Reshjet e dëborës të cilat munguan gjatë dimrit, duket se këto ditë nuk dinë të ndalen. Kështu reshjet e dendura janë bërë shkak për ndërprerje të energjisë në veri të vendit.
Operatori i Sistemit të Transmetimit (OST) ka bërë të ditur se ndërprerje të energjisë ka patur në disa zona si: Kukës, Kalimash, Fushë Arrëz dhe në Bajram Curr. Pavarësisht kushteve klimaterike, ekipet e OST po punojnë intensivisht për rikthimin e energjisë në këto zona.
Reshjet e dendura të dëborës kanë shkaktuar vështirësi edhe në zona të tjera të vendit. Në Korçë, kanë vështirësuar qarkullimin e automjeteve, duke bërë të pakalueshëm aksin rrugor Qafë Thanë-Prrenjas. Në këtë aks është duke u punuar për hapjen e tij me borëpastruese. Aksi rrugor Qafë-Plloçë mund të kalohet vetëm me zinxhirë ndërsa në aksin Pogradec-Korçë janë ndaluar shumë automjete për shkak të mungesës së zinxhirëve në qarkullim.
Në rrethin e Pukës, trashësia e dëborës ka arritur deri në 60 cm, në disa vende. Për shkak të kësaj, qarkullimi i automjeteve mund të bëhet vetëm me zinxhirë. E njëjta situatë është edhe në Tropojë dhe Dibër, ku në zonat rurale, dëbora ka arritur në 25 cm lartësi, ndërsa në qytet në 15 cm.