Kryeministri Ramush Haradinaj, ka pritur në takim një delegacion mjekësh nga Turqia, të kryesuar nga Esen Uysal, Koordinatore e Qendrës Ndërkombëtare të Trajtimit të Emergjencave dhe Fatkeqësive në Izmir të Turqisë.
Zyra e Kryeministrit përmes një kumtese për media ka bërë të ditur se bashkëpunimi në fushën e mjekësisë, avancimi i shërbimeve të vendit në dhënien e ndihmës së parë dhe trajnimi i stafit mjekësor në disa fusha specifike ishin temat e këtij takimi.
“Shërbimet emergjente janë kurriz i gjithë shëndetësisë. Kosova ka ende nevojë për ofrimin e mbështetjes nga jashtë”, tha Kryeministri Haradinaj.
Projekti për shërbimet emergjente në tërë vendin, deri tani ka mbështetur trajnimin dhe edukimin e 120 mjekëve nga gjithë vendi si dhe trajtimin dhe shërimin e mbi 100 pacientëve.
Për këtë takim Haradinaj ka shkruar edhe përmes rrjetit social Facebook.
“Secili kontribut që avancon shëndetësinë publike do ta ketë përkrahjen tonë”, ka shkruar ai.
Pjesë e takimit ishte edhe Basri Lenjani, specialist i mjekësisë emergjente dhe u.d i Drejtorit të Klinikës Emergjente.
