Lëvizja Vetëvendosje ka reaguar menjëherë pasi drejtori i Drejtorisë për Kundër Terrorizëm në kuadër të Policisë së Kosovës, Fatos Makolli, ka zbuluar se Policia është e bindur se Vetëvendosje qëndron prapa sulmit në Kuvendin e Kosovës.
Vetëvendosje thotë se nga paraqitja e sotme televizive e Makollit "u konfirmua edhe njëherë se si Policia e Kosovës është vënë tërësisht nën shërbimin e klanit pronto dhe aktivitetin e saj kryesor dhe më të zellshëm e ka luftën speciale ndaj Lëvizjes Vetëvendosje".
Sipas partisë opozitare të udhëhequr nga Visar Ymeri, drejtori i njësitit anti-terror të Policisë së Kosovës "vazhdoi luftën politike të nisur nga Policia e Kosovës me disa konferenca menjëherë pas arrestimit të 6 aktivistëve të Vetëvendosjes".
Sipas Vetëvendosjes, "asnjë fakt i ri nuk u paraqit por thjeshtë përsëritën shpifjet dhe montimet e paraqitura nga policia në ato konferenca".
"Asnjë nga aktivistët e arrestuar nuk është marrë në pyetje nga prokuroria, as edhe një muaj pas arrestimit të tyre, dhe kjo po ndodh saktësisht ngase nuk ka asnjë fakt që do të dëshmonte njëmend lidhjen në mes sulmeve me bomba dhe aktivistëve tanë. Kjo u konfirmua edhe nga intervista e këtij drejtori të anti-terrorit, i cili as edhe një gjë të re nuk e tha në këtë intervistë", thuhet në një reagim që Vetëvendosje e ka publikuar në faqen e saj në Facebook.
"Është shqetësuese se si vetëm një ditë para se gjykata të marrë vendim për vazhdimin ose jo të masës së paraburgimit ndaj aktivistëve të Vetëvendosjes, ky drejtor i Policisë del dhe zhvillon një propagandë politike tipike për klanin pronto", vazhdon reagimi.
"Për më tepër, skandali më i madh, që nuk ka ndodhur asnjëherë deri sonte në Republikën e Kosovës është se si policia merr vendim në vend të Gjykatës për vazhdim paraburgimi ndaj dikujt. Sonte drejtori i njësitit anti-terror tha se aktivistëve të arrestuar u është vazhduar masa e paraburgimit, anipse nuk ka asnjë vendim gjykate për këtë dhe asnjë nga aktivistët e arrestuar apo avokatët e tyre nuk ka një vendim të tillë. Vetëm në shtetet totalitare, Policia kryen rolin edhe të prokurorisë e edhe të gjykatës. Vetëm në vendet totalitare policore, policia i tregon Gjykatës se si duhet të sillet me njerëzit e arrestuar. Asnjëherë deri sot, nuk ka ndodhur që Policia publikisht në një medium të kumtojë “vendim” gjykate, pa u njoftuar palët e përfshira që janë të akuzuarit dhe avokatët e tyre", thuhet në reagimin e VV'së.
Sipas partisë opozitare, nga intervista e Makollit "u dëshmua që në Kosovë nuk ka gjykata, nuk ka prokurori, nuk ka polici të njëmendtë hetuese por krejt çka ka është polici terrorizuese që e kryen funksionin e të trija këtyre".
