Kreu i FIFA-s, Zep Blater, është pezulluar përkohësisht për 90 ditë nga Komiteti i Etikës i “qeverisë” botërore të futbollit.
Lajmin e bën të ditur këshilltari i 79-vjeçarit zviceran, sipas të cilit vendimi do të miratohet zyrtarisht brenda të enjtes.
“Lajmi iu bë i ditur presidentit këtë pasdite”, deklaroi Klaus Stohlker, këshilltar i Blaterit për marrëdhëniet me publikun.
79-vjeçari do të jetë i pezulluar deri në janar, pak më tepër se një muaj para mbajtjes së zgjedhjeve të parakohshme për të zgjedhur udhëheqësin e ri të FIFA-s.
Blater aktualisht është nën hetim nga autoritetet zvicerane për korrupsion dhe evazion fiskal.
