Policia e Shtetit jep detaje për arrestimin e të shumëkërkuarit Admir (Gjuljano) Çerpja, një nga organizatorët e grupit të grabitjeve të vlerave monetare në rrugën e Rinasit.
Në një deklaratë zyrtare thuhet se pas një operacioni disa ditor në qarkun Dibër, ku u përfshinë forcat policore të Drejtorisë Vendore të Policisë Dibër, Renea, Forca e Posaçme Operacionale dhe FNSH, u bë e mundur kapja e të shumëkërkuarit Admir Çerpja, një nga organizatorët e grabitjeve në aksin rrugor Qafë Kashar -Rinas.
Admir (Gjuljano) Çerpja, 35 – vjeç, banues në Bathore të Tiranës u kap në orët e mbrëmjes.
Në vijim të operacionit “Patriot” që po vijon nga strukturat e Policisë së Shtetit, për kapjen e të gjithë personave, organizatorë, pjestarë të grupit apo të përfshirë në grabitjet me armë të vlerave monetare në rrugën e Rinasit, si rezultat i trysnisë policore të ushtruar në disa zona të rrethit Dibër për kapjen e Admir Çerpja, rezultoi se:
Rreth orës 21.00, në fshatin Zalldardhë të Dibrës forcat policore kanë bërë të mundur kapjen dhe arrestimin e Admir Çerpja.
Ky shtetas po afrohej për t’ u futur në fshatin Zalldardhë në orët e mbrëmjes për të blerë ushqim.
Në vijim të kontrolleve të shumta dhe menaxhimit të informacionit të grumbulluar në mënyrë të pandërprerë në lidhje me vendodhjen e këtij personi, u bë e mundur ndërhyrja në kohë duke prangosur shtetasin e lartpërmendur.
Admir Çerpja është shoqëruar në Drejtorinë Vendore të Policisë Tiranë për veprimë të mëtejshme.
Policia e Shtetit vazhdon kërkimin me grupe të shumta në zona të tjera veriore për kapjen dhe vënien përpara përgjegjësisë ligjore të autorëve të tjerë të shpallur në kërkim.
