Guvernatori i Bankës së Shqipërisë, Gent Sejko, është takuar të premten me ambasadorin grek në Tiranë, Leonidas Rokanas.
Takimi Sejko-Rokanas është bërë në kuadër të marrëdhënieve dypalëshe ekonomike, por në të janë diskutuar edhe zhvillimet më të fundit në Greqi.
Këshilli Mbikëqyrës i Bankës së Shqipërisë deklaroi të mërkurën se dalja e Greqisë nga eurozona, edhe pse nuk i cënon bankat shqiptare, mund të godasë rritjen ekonomike të vendit. Konkluzionin e bëri publik guvernatori pas mbledhjes së këshillit.
“Kriza greke mund të ndikojë në korrektimin e rritjes ekonomike. Po bëjmë të gjitha llogaritjet e mundshme të skenarëve pozitivë dhe negativë, por, për momentin ne jemi në përputhje të plotë me Fondin Monetar Ndërkombëtar dhe me qeverinë shqiptare për rritjen ekonomike”, tha Gent Sejko.