Lojtarët e Shkëndijës u gëzuan për fitoren në ndeshjen e fundit të gjysmësezonit vjeshtor (3:1) ndaj Sileksit.
Me këtë tetovarët kanë mbajtur hapin me kryesuesit e tabelës së LPFM, Struga Trim Lum kampion vjeshtor dhe Shkupi në vendin e dytë.
“Personalisht, mendoj se kjo ishte ndeshja jonë më e mirë në gjashtë muajt e fundit, sepse kishim gjithçka nën kontroll. E nisëm ndeshjen shumë mirë dhe shënuam herët. Më pas u penalizuam në pesë minutat kur nuk ishim në nivel, por e kaluam shpejt krizën. Ne ishim kompakt si grup, organizuam sulme të mira.
Pas golit të dytë, kartoni i kuq ishte i vështirë, por lufta e grupit çoi në golin e tretë dhe një fitore të merituar”, komentoi Nuhiu ndeshjen.
Ndër të tjera ai iu referua gjysmësezonit të përfunduar, si dhe ambicieve dhe mundësive të Shkëndijës për fundin e sezonit.
“Mendoj se kemi bërë një gjysmë-sezon të mirë. Ne ishim konkurrues dhe jemi në rrugën e duhur.
Djemtë punuan mirë, shoh ecurinë e ekipit. Si trajner i ri m’u desh kohë, mendoj se ia kalova ngadalë idetë lojtarëve.
Mendoj se gara për titull do të jetë e hapur deri në fund. Do të ketë një betejë të madhe për titullin, por edhe për mbijetesën.
Mendoj se jemi mjaft të fortë për të qenë kampionë.
E njoh karakterin e lojtarëve, e di që do të përparojmë sepse ky është sporti ynë. Skuadrës ekzistuese do t’i shtojmë dy-tre përforcime. Nuk do të jetë e lehtë, rivalët janë përballë dhe nuk dua të flas fare për garën e kampionatit”, përfundoi Nuhiu.
Shkëndija ka 35 pikë, tre më pak se Shkupi dhe katër më pak se Struga Trim Lum.
