Më shumë se një negocim, po bëhet një intrigë ndërkombëtare.
Nga njëra anë Rafa Leao, Maldini, Massara dhe një pjesë e rrethit të lojtarit.
Nga ana tjetër, Jorge Mendes, i cili duket se nuk e ka ndërmend të ulet në këtë tryezë ose, më saktë, papritur u ndje i mënjanuar.
Historia e një kampioni të tërhequr nga fanella dhe të skuadrave të interesuara për të e që nuk dinë më me kë të flasin.
Pyetja e njohur prej disa kohësh është rikthyer sërish në modë kur xhevahiri i Piolit dukej se ishte më afër se kurrë rinovimit. Wshtë ‘A Bola’, gazeta e njohur portugeze, që u kujdes për rinisjen e hipotezës së lamtumirës duke folur për kontaktet e vazhdueshme mes Leaos dhe Chelseat.
Nëse nga njëra anë, siç u përmend, Milani është në negociata me lojtarin, babain e tij dhe avokatin Dimvula, nga ana tjetër Mendes kërkon një ndarje e cila do t'i garantonte atij, si këshilltar familjar, një komision mjaft të mirë.
Pra, çfarë do të ndodhë? Vullneti i përbashkët është të arrihet një rinovim me Milanin.
Kjo të paktën sipas fjalëve të vetë Leaos pas kualifikimit në gjysmëfinale të Ligës së kampioneve.
Natyrisht që negociatat nuk janë mbyllur, sepse ka ende një hendek midis ofertës dhe kërkesës (7 milionë kërkesa e lojtarit, 6 plus bonuse oferta e kuqezinjve) dhe, mbi të gjitha, borxhi i Sportingut të Lisbonës mbetet për t'u zgjidhur, me gjobën për t’u paguar, duke mos lejuar ndërhyrjet nga Lille.
Është e qartë se Chelsea mund të vendosë më shumë para në pjatë. Po aq e qartë është se, nëse nuk arrihet një marrëveshje, Milani do të detyrohet ta shesë lojtarin në tregun e ardhshëm të transferimeve.
E kualifikimi në gjysmëfinale të Ligës së kampioneve mund të rrisë më tej vlerën e Leaos dhe të tërheqë vëmendjen e klubeve të tjera.
Sigurisht, për momentin, ka nga ata që po punojnë drejt një fundi të lumtur me ngjyrat kuqezi dhe nga ata që, përkundrazi, kërkojnë diku tjetër. Loja është ende e hapur..
