Festa argjentinase nuk u qetësua në minutën e 90-të të ndeshjes së fituar ndaj Kroacisë, por vazhdoi gjatë gjithë natës, kudo që rrahin zemrat e kombit amerikano-jugor, i cili arriti në finalen e Kupës së Botës në Katar, ku pret të njohë kundërshtarin për t’u përballur për trofeun më të rëndësishëm.
Skena gëzimi të papërmbajtshme në fushë, në tribuna dhe në rrugët e mbushura me miliona tifozë të çmendur nga bëmat e Messit e shokëve të tij. Të cilat nuk kanë mbetur pas edhe kështu, teksa është rishfaqur një video e re e asaj që ndodhi në dhomat e zhveshjes menjëherë pas “pushtimit” të finales së 18 dhjetorit, shkruan telesporti.
Tashmë gjatë Botërorit, në tokën e Katarit, ajo që doli nga shenjtëria e dhomave të zhveshjes (barku i stadiumit) kishte shkaktuar diskutime, duke hapur një polemikë pikërisht ndaj Albiceleste dhe Leo Messit. Ndodhi me rastin e ndeshjes në fazën e grupeve kundër Meksikës, në një derbi të gjithë Amerikës Jugore, që nuk i shmangu “goditjet e ulëta”. Në të vërtetë shumë të ulëta, si në rastin e akuzave ndaj “Pleshtit”, fajtor për kryerjen e një akti ekstrem antisportiv.
Në video shiheshin lojtarët argjentinas që i gëzoheshin suksesit 2-0 ndaj meksikanëve, teksa kishin përzënë menjëherë fantazmat e Arabisë Saudite. Mes tyre edhe Leo Messi, i cili për një çast duket se ka goditur një fanellë të kombëtares meksikane me tabanin e këpucës. Video filtrohet në rrjetet sociale dhe i gjithë “ferri” shpërthen rreth yllit argjentinas, një vorbull polemikash dhe akuzash që më pas çojnë në kërkim-faljet ritual. Këtë herë incidenti duket se përsëritet, por nën objektiv nuk është ndonjë gjest në veçanti, por “refreni muzikor” i zgjedhur nga lojtarët e Albiceleste për të festuar finalen e Botërorit.
Krahasuar me videon pas fitores ndaj Meksikës, ajo që po çmend sot rrjetet sociale ka një kolonë zanore krejtësisht të ndryshme. Gjithmonë një himn gëzimi dhe lumturie, por që po shërben si shkas për polemika të reja. Më konkretisht është teksti i këngës së përdorur, “Yo soy así, soy argentino”, “Unë jam kështu, unë jam argjentinas”, një manifest i qartë i identitetit kombëtar, që megjithatë ka ngjallur bezdi te shumë veta, veçanërisht brazilianët dhe anglezët. Këto janë pikërisht dy vendet, të cilave iu referohet kënga, duke kujtuar rivalitetet e futbollit dhe ato politike.
Ky është teksti i këngës së kënduar nga Messi, Dybala dhe të gjithë anëtarët e “ekuipazhit” botëror të Scalonit, në një atmosferë festive që asgjë nuk mund ta parashikonte të kthehej në një polemikë të re. Por cilat ishin referencat që ringjallën mosmarrëveshjen? Para së gjithash referenca e dyfishtë për Brazilin, i eliminuar nga Kroacia. “Brazilian çfarë ndodhi”, – thotë kënga, “pesë herë kampioni i botës u tkurr”, duke nënvizuar eliminimin e parakohshëm të favoritit numër për fitoren përfundimtare të “Katar 2022”. Kjo për të kujtuar disfatën e fundit (dhe ende djegëse) në Kupën e Amerikës 2021, mes Brazilit dhe Argjentinës, e fituar nga bardhekaltrit në shtëpinë e pesë herë kampionëve të botës (“Messi u nis për në Rio dhe u kthye me kupën”.
Por nëse sarkazma klasike e stadiumit është e rezervuar për kundërshtarët e futbollit të të gjitha kohërave, është pikërisht Anglia, ajo që preket keq nga teksti. “Anglezë, bij kur*ash, nuk do t’i harrojmë Malvinas”, – këndohet në një varg duke kujtuar vitin 1982 dhe përpjekjen (e dështuar) të qeverisë argjentinase për të rimarrë Ishujt Falkland (Malvinat) me një ndërhyrje ushtarake në Mbretërinë e Bashkuar, duke pretenduar gjithmonë sovranitetin e saj. Një referencë e konsideruar e tepruar nga shumica, sigurisht jashtë vendit dhe kontekstit, e cila errëson edhe një herë atmosferën festive të kombëtares së Scalonit. Sidoqoftë, “banda argjentinase”, është gjithmonë e gatshme për të brohoritur.
