Kreu i Partisë Demokratike, Lulzim Basha, në një takim me shoqatat e biznesit, shprehu shqetësimin për gjendjen katastrofike, sipas tij, të bujqësisë në vend.
“Gjendja e bujqësisë është katastrofë totale. Aktiviteti bujqësor është kthyer në jofitimprurës. Në këto 4 vite, nuk është investuar në bujqësi. Buxheti është ulur drastikisht dhe ato pak para’ për këtë sektor, kanë përfunduar në skema korruptive ku përfiton një grusht klientësh i lidhur me pushtetin”, tha Basha.
Kreu i PD premtoi se do të rikthehen subvencionimet për fermerët. “150 milionë euro për sektorin e bujqësisë dhe politikë mbrojtëse për fermerin”, theksoi Basha.
“Platforma jonë ekonomike ka qenë rezultat i punës së opozitës me sipërmarrjet shqiptare dhe sektorët që përbëjnë ekonominë shqiptare. Nuk na ka ardhur me postë nga Berlini”, shtoi Basha.