Kreu i Kuvendit Ilir Meta, ai i Bashkisë Erion Veliaj, si dhe politikanë të tjerë kanë përkujtuar sot 72-vjetorin e çlirimit të Tiranës.
Ata kanë bërë homazhe gjatë paradites te monumenti Ushtari i Panjohur në nder të dëshmorëve të rënë gjatë luftës.
Në mesazhet e përcjelluara përmes medias, Meta dhe Veliaj vunë theksin tek çuarja përpara i proçeseve integruese të vendit.
"Ky 17 nëntor është një mundësi shumë e mirë për të parë më me optimizëm drejt të ardhmes europiane të vendit tonë, padyshim të kryeqytetit që luan një rol kryesor, drejtues si gjithmonë në këto procese transformuese të vendit tonë", ka thënë Meta.
"Mesazhi i freskët që na vjen nga ajo kohë është që për kryeqytetin dhe për vendin historia kërkon sakrifica. Fatmirësisht historia sot nuk kërkon sakrificat e dhënies së jetës për kryeqytetin por sigurisht sot kërkohet që të ndërtojmë me të njëjtin pasion dhe të jemi me të njëjtën energji, ashtu si të rinjtë e 72 viteve më parë luftuan për të ruajtur dinjitetin e vendit tonë. Ky është një moment i mirë.72 vjet më parë negociuam qëndrimin tonë europian si pjesëmarrës të një aleance për të çliruar Europën, sot jemi në prag të hapjes së negociatave dhe besoj që kemi hedhur një hap të sigurt për të qenë anëtarë të denjë, por edhe juridikisht të BE. Të gjithë ata që ndoshta janë të ardhur në Tiranë duhet të kuptojnë që ky vend nuk është pa histori. Historia fillon me ata që themeluan qytetin, me ata që luftuan për ta çliruar dhe me ata që sot po ndërtojnë qytetin", ka thënë Veliaj.
