Kryetari i Partisë Demokratike, Lulzim Basha, emëroi sot Ervin Salianjin në detyrën e Sekretarit për Aksionin Qytetar.
Sipas një njoftimi për media nga PD-ja, ky sekretariat do të jetë në funksion të qytetarëve, zërit të tyre dhe nxitjes së tyre për mobilizim dhe aksion kundër arrogancës qeveritare, korrupsionit dhe padrejtësive.
“Z. Salianji vjen nga një përvojë në këtë drejtim, ku si koordinator i Partisë Demokratike dhe drejtues i Departamentit për të Drejtat e Njeriut ka qenë në kontakt të vazhdueshëm me qytetarët dhe problematikat e tyre”, thuhet në komunikatën e demokratëve.
Ervin Salianji ka përfunduar studimet e larta për Drejtësi dhe aktualisht po përfundon doktoraturën në të drejtë publike/kushtetuese. Në 2013-n u emërua koordinator për çështjet ligjore në Partine Demokratike, kurse në vitet 2011-2014 ishte avokati i qytetit të Tiranës. Salianji është anëtar i Këshillit Kombëtar të PD-së dhe ishte kandidat për kryetar të Forumit Rinor të PD-së.