Qeveria do t’i akordojë një ndihmë financiare prej pesë milionë lekësh familjes së kreut të FNSH-ve të Shkodrës, i cili u vra në krye të detyrës të shtunën e kaluar. Në mbledhjen e sotme, Këshilli i Ministrave ka vendosur që kjo shumë të përballohet nga fondi rezervë i buxhetit të shtetit.
Vendimi i qeverisë
VENDIM PËR DHËNIE NDIHME FINANCIARE FAMILJES SË TË NDJERIT SIMON GJON GJETA, ISH-PUNONJËS POLICIE, I VRARË NË KRYE TË DETYRËS.
Në mbështetje të nenit 100 të Kushtetutës, të ligjit nr. 9936, datë 26.6.2008, ndryshuar, dhe të ligjit nr. 160/2014, “Për buxhetin e vitit 2015”, me propozimin e ministrit të Punëve të Brendshme, Këshilli i Ministrave vendosi:
Dhënien e ndihmës financiare prej5 milionë lekësh familjes së të ndjerit Simon Gjon Gjeta, ish-punonjës policie në Komisariatin e Policisë të Ndërhyrjes së Shpejtë Shkodër, i vrarë në krye të detyrës.
Ky fond përballohet nga fondi rezervë i buxhetit të shtetit.
Ngarkohen Ministria e Punëve të Brendshme dhe Ministria e Financave për zbatimin e këtij vendimi.
Ky vendim hyn në fuqi menjëherë.
