Operatori i Shpërndarjes së Energjisë Elektrike (OSHEE) ka nisur një aksion kombëtar për arkëtimin e faturave të energjisë elektrike dhe uljen e debive, duke ndërprerë lidhjet e paligjshme. Në fokus të këtij aksioni janë vendosur edhe bizneset, që zënë një pjesë të konsiderueshme të portofolit të bilancit financiar dhe energjetik.
Në këtë pikë, shoqëria njoftoi se po i kushton vëmendje edhe sektorit privat të “profesioneve të lira”, një pjesë e mirë e të cilëve e ushtrojnë aktivitetin në ambiente të marra me qira, duke mos pasur kontrata dhe kategorizimin e duhur në bazë të statusit të aktivitetit që zhvillojnë, por edhe të mënyrës së tarifimit.
Nga analizat e realizuara deri tani, Departamenti Shitjeve dhe Arkëtimeve në OSHEE ka evidentuar 10,849 subjekte aktive të regjistruara në QKR, të cilët ushtrojnë aktivitet në fushën e shërbimit dhe konsulencës në bazë të legjislacionit në fuqi për profesionet e lira. Sipas OSHEE, këto ditë ka nisur një aksion për verifikimin e kontratave, bazuar mbi të dhënat e siguruara nga QKR, ndaj shoqëria i bëri thirrje publikisht kësaj kategorie biznesi, të marrë masat e menjëhershme për t’iu përgjigjur apelit për respektim të ligjit.
Fokusi do të jetë Tirana, ku e ushtrojnë aktivitetin e profesionit jurist, ekonomist, mjek, etj, rreth 60% e biznesve të kategorisë “profesione të lira”. Gjithashtu, OSHEE ka nisur kontaktet me organizatat që përfaqësojnë këtë sektor, për të arritur një bashkëpunim dhe rezultat të frytshëm.