Politika e maxhorancës aktuale është kryefund nje politikë diletante që, kështu siç është, nuk mund të premtojë asgjë për të ardhmen. Lidërshipi politik i maxhorancës, qeveria aktuale, e zgjedhur me naivitet nga kryeministri Rama, pa e përfillur fare historinë politike të këtij vendi, po e sjell rezultatin e saj negativ. Rama mendoi se, qenia kryeministër nuk ka nevojë për të qenë poltikan apo profesionist në një nga fushat e shtetit. Madje, saipas tij, ai nuk kishte as nevojë për eksperiencë parlamentare .(!) Por tani, ai po e sheh se si po i vjen “festja vërdallë”, dhe jo nga opozita, por nga ngërçi në drejtimin e shtetit dhe të Parlamentit. Veçse, koha nuk të pret. Rama nuk e njeh dot kohën politike dhe as akumulimin politik të pakënaqësisë, sepse, duke qënë në delir dhe pa eksperiencë, i kishte neveritur këta ingredientë, sepse nuk i njihte. Dhe shiheni: ende ai ka ngërç kur flet në Parlament, dhe ende s’e kupton dot ngase i vjen ai ngërç, sepse s’e njeh arsyen politike. Nuk bën dot debat me gazetarë kundërshtarë, sepse nuk është politikan. Nuk di të artikulojë politikë, prandaj e tremb edhe Tom Doshi, i cili është një parlamentar që i ka dhënë shumë PS-së dhe vetë Ramës; sepse ajo ishte politika që njihte Rama. Por ngerçi nuk është te Doshi, por te Rama…kurse Rama, tani që e kuptoi se nuk ecën dot, në fakt s’lëviz dot se nuk e lë Meta. Dhe Mëtën vetë e zgjodhi, sepse nuk e njihte dhe s’e kuptonte dot se si mund të ishte një fitore politike në zgjedhje të lira. Prandaj tani, duket qenë i ngrirë midis Metës, dhe pakënaqësisë se Grupit të politikanëve të Partisë Socialiste, ka mbetur në ngërçin absolut të ecjes përpara… Dhe pandaj e ka shumë të vështirë që ta presë këtë Nyje Gordiane: ai ndërkaq është në frikën e pushtetit dhe brenda mungesës së arsyes politikë të forcës për të zgjidhur apo për të prerë Nyjen.
Por, ajo që të habit më shumë, është revolta e disa socialistëve dhe medias të majtë kundër deputetit Tom Doshi. A e dini ju se njeriun më të korruptuar e keni Kryetar Kuvendi? Doshi, zotërinj, i ka bërë paratë vetë si biznesmen, para se sa të ishte deputet. I dini pallatet dhe paratë e pista të Ilir Metës; madje i kapur në flagramcë duke abuzuar? Pse nuk jeni realistë? Çfarë dëmi mund t’i sjellë maxhorancës revolta e një deputeti që ka jehonë pozitive në zonën e tij, në krahasim me Metën, abuzues klasik dhe blerës dhe vjedhës votash? Rama duhet ta kuptojë se, kjo gjendje, politikisht quhet shpërthyese. Ai duhet të dijë të kalojë nga naiviteti i një kryebashkiaku afrikan, në politikbërjen e një kryeministri europian. Por, a e bën dot? Po s’e bëri, do të humbasë pafundësaisht kohë politike dhe do ta gjejë veten befas përballë falimentit, duke folur më shumë me xheste se sa me fjalë.