Opozita shqiptare po përdor ndërhyrjen e ndërkombëtarëve si në alibi për të dalë nga ngërçi politik ku ka futur veten, por dhe vendin. Kështu shprehet deputetja e Partisë Socialiste, Valentina Leskaj lidhur me qëndrimin e demokratëve për të pasur një garant ndërkombëtar. Sipas ligjvënëses socialiste, mazhoranca e sotme i ka plotësuar disa nga kërkesat e demokratëve para kësaj ndërhyrje të ndërkombëtarëve. Ajo shpreh gatishmërinë e shumicës për të bashkëpunuar edhe për dekriminalizimin e parlamentit, por thekson se kjo nuk duhet të përdoret për nevojat e politikës së ditës.
Zonja Leskaj pas takimeve që zoti Kukan zhvillon sot me krerët e politikës shqiptare, mendoni se do të kemi një marrëveshje mazhorancë-opozitë?
Në fakt ne nuk është se na kanë munguar angazhimet e partnerëve ndërkombëtarë. Por problemi qëndron këtu në Shqipëri, nuk qëndron atje. Çka do të thotë se zgjidhja duhet të burojë nga këtu dhe në fakt, para së gjithash, dua të them se ne nuk duhet të presim çdo herë që të vijnë ndërkombëtarët për të pasur një zgjidhje, politika këtu duhet të marrë përgjegjësitë e veta. Insistimi i PD-së për garant ndërkombëtar më shumë sesa nevojë, është një arsye për të dalë nga kutia ku e ka futur veten. Ajo po përpiqet të gjejë një dalje dhe për këtë arsye përdori si alibi nevojën për një garant ndërkombëtar. E them këtë sepse gjërat u bënë dhe pa kërkesën për garant ndërkombëtar. Për shembull, ndryshimet në rregulloren e parlamentit, ngritja e komisionit hetimor, garancia dhe deklarata e kryeministrit për respektimin e vendimeve të Gjykatës Kushtetuese, ne ua dhamë atyre pa qenë nevoja e ndonjë presioni apo asistimi të garantit ndërkombëtar. Çka do të thotë që këto kërkesa që ata kishin në tavolinë, ua ofruam duke ndjekur një model krejtësisht tjetër nga ai që ka ndjekur PD-ja. Të gjithë jemi dëshmitarë që ne e kemi kërkuar prej vitesh ndryshimin e rregullores, ata e kanë refuzuar. Ndërkohë që ne e bëmë ndryshimin e rregullores. Kjo çështja e garantëve ndërkombëtarë më shumë ka qenë një alibi për ta përdorur edhe brenda rrethit të tyre për të justifikuar ardhjen në parlament, sesa është e vërtetë. E dyta sa i përket bojkotit dhe argumenteve që edhe PS-ja ka bërë bojkot, është e vërtetë që dhe ne kemi bërë bojkot por ka një diferencë të madhe mes tyre. Bojkoti i PS-së u ngrit mbi një kauzë që ishte kauza e zgjedhjeve. Zgjedhjet janë elementi i parë për një demokraci funksionale. Pra ai bojkot u ngrit mbi një kauzë ndërsa bojkoti i tanishëm nuk u ngrit mbi një kauzë por u ngrit mbi një individ, për shkak se një individ u cenua në parlament nga individë të tjerë. Dhe kjo është një diferencë e madhe në demokraci. Aq më tepër që në rastin e këtij bojkoti çështjen e ka në dorë drejtësia. Çka do të thotë që nuk e ka më në dorë mazhoranca, nuk e ka më në dorë parlamenti dhe s’ka arsye për të bojkotuar parlamentin. Ajo kauzë nuk ekziston dhe kjo është një diferencë mes dy bojkoteve. Le ta diskutojmë nëse bojkoti është i mirë apo jo? Natyrisht që unë e kam thënë dhe në atë kohë që bojkoti në një farë mënyre nuk është zgjedhje dhe nuk ka qenë zgjedhje, nuk besoj se është rruga më e mirë.
Për opozitën dekriminalizimi i parlamentit është një kauzë, madje sipas zonjës Bregu ky term është përdorur dhe në dokumentet ndërkombëtare...
Sa i përket çështjes së dekriminalizimit të parlamentit, e cila ka dalë tani, nuk ishte në momentin e bojkotit, unë absolutisht jam për dekriminalizimin e parlamentit. Opozita duhet të vijë në parlament, të ulemi për modalitetet, të gjendet një e përbashkët se cila është rruga më efektive për ta bërë këtë. Natyrisht për mua çështja e dekriminalizimit të parlamentit është shumë e rëndësishme sepse parlamenti është institucioni që miraton gjithë korpusin legjislativ dhe prandaj është shumë e rëndësishme, është institucioni nga i cili burojnë institucione të tjera të pavarura që kanë të bëjnë me zbatimin e ligjit apo me drejtësinë. Në këtë pikëpamje çështja e një parlamenti të pastër, kredibël është shumë e rëndësishme. Asnjëherë në dijeninë time, kjo mazhorancë nuk ka pasur lëkundje në vullnetin politik për dekriminalizimin e parlamentit. Kurrë nuk është vënë në diskutim apo refuzuar nga ne. Çështja është që kjo mos përdoret për nevojat e politikës së ditës. Sepse çështja themelore në një marrëveshje është se sa e qëndrueshme është sepse ne jemi ulur shumë herë, kemi diskutuar, ka funksionuar për një kohë dhe jemi rikthyer prapë ku ishim. Prandaj problemi më i madh është qëndrueshmëria. Që këto marrëveshje të rezultojnë afatgjata nuk duhet të kenë si qëllim interesat politike të ditës, nuk duhet të kenë si qëllim nevojat e ditës të një force politike të caktuar siç është në rastin konkret nevoja e PD-së për të gjetur një dalje nga situata ku e ka futur veten edhe vendin.
A mund të pranohet një projektligj me fuqi prapavepruese?
Aktualisht nuk mund të diskutojmë me supozime. Aktualisht nuk kemi një projekt konkret, i cili mund të diskutohet në tavolinë nga palët dhe secila të ketë opsionin e vet. Unë shpresoj të ketë një reflektim edhe pas vizitës së dy politikanëve, zotit Flekenshtajn, i cili ishte këtu dhe zotit Kukan, i cili ka një eksperiencë të gjatë angazhimi në ngërçet dhe në situatat politike që janë krijuar në Shqipëri.
Do të duhet një marrëveshje e firmosur për të garantuar qëndrueshmëri?
Problemi është që duhet të ketë transparencë nga PD-ja dhe të vijë projekti konkret, por theksoj që kjo të mos përdoret si nevojë e politikës së ditës.
Zgjidhja e ngërçit, Bregu: Kukan nuk do të vinte në rast të kundërt
Ardhja e europarlamentarit Eduard Kukan në Tiranë do të shënojë konkretizimin e marrëveshjes mes mazhorancës dhe opozitës. Kjo pohohet dhe nga deputetja e Partisë Demokratike, Majlinda Brengu ndërsa pohon se: “Nuk besoj se zoti Kukan do të vinte nëse nuk do të kishte pritshmëri se do të kishte zgjidhje të situatës, me ato kushte dhe kritere që ne tashmë i kemi bërë të qarta”. Bregu thekson sërish kërkesën kryesore të demokratëve, dekriminalizimin e parlamentit e cila, sipas saj, tashmë është kthyer në një çështje jo vetëm për opozitën por dhe për faktorin ndërkombëtar.
Zonja Bregu pas vizitës së sotme të zotit Kukan, sa shpresa ka për një marrëveshje përfundimtare dhe rikthimin e opozitës në kuvend?
Nuk besoj se zoti Kukan do të vinte nëse nuk do të kishte pritshmëri se do të kishte zgjidhje të situatës, me ato kushte dhe kritere që ne tashmë i kemi bërë të qarta. Pasi ka biseduar me eurodeputetin Flekenshtajn, ai vjen për të përcjellë pjesën tjetër të bisedës, për faktin se axhendat e tyre ishin të shkëputura. Prandaj të shohim nesër, pas tre takimeve që do bëjë. Nga ne e kanë marrë qartësinë, tani të shohim çfarë përgjigje do të ketë nga mazhoranca.
Sa i përket hartimit të një ligji për dekriminalizimin e parlamentit, sipas jush duhet të jetë një ligj që duhet të veprojë dhe për parlamentin aktual?
Çdo gjë është për t’u sqaruar. E rëndësishme është që dekriminalizimi sot si asnjëherë tjetër, ndoshta siç nuk ka ndodhur as në parlamentet e vendeve të tjera të cilat kanë pasur problematika me krimin, është ngritur në një nivel kaq të lartë sa të bëhet temë kryesore dhe kërkesë e cila vjen dhe nga Parlamenti Evropian dhe nga dokumentet evropiane. Ka qenë dhe në Progres-Raport, nuk është vetëm kërkesë e Parlamentit Evropian dhe Partisë Demokratike. Kjo do të thotë se e gjithë kauza që opozita ka ngritur gjatë këtyre muajve është kauzë që ka qëndruar dhe ka bindur edhe ndërkombëtarët që është problem madhor.
