Kontrolli i Lartë i Shtetit ka kallëzuar në prokurori tre ish-drejtues të komunës Udenisht në Pogradec dhe tre zyrtarë të komunës Remas në Lushnjë për shpërdorim detyre.
Gjatë një auditi të kryer nga ky institucion në Komunat e mësipërme për periudhën Janar 2011- Shtator 2013, janë konstatuar një sërë shkeljesh të dispozitave ligjore të cilat i kanë sjellë një dëm ekonomik për Buxhetin e Shtetit në vlerën 14,8 milionë lekë(mbi 100 mijë euro).
Tre ish-drejtuesit e komunës Udenisht (ish-Kryetarët e Komunës dhe ish-Kryetari i Këshillit të Komunës) kanë dhënë leje ndërtimore në prona shtetërore si dhe në bregun liqenor, zonë turistike, duke zbardhur vendime në emër të KRRT dhe të Këshillit të komunës, pa i diskutuar në mbledhjet dhe pa i shënuar në protokollet përkatëse, si dhe kanë dhënë me qira një sipërfaqe toke prej 21,330 m2, në kundërshtim me ligjin dhe pa zhvilluar procedurat ligjore.
Ndërkaq tre zyrtarët e komunës Remas kanë kryer veprime dhe mosveprime të kundërligjshme gjatë ushtrimit të detyrës si anëtarë të Komisionit të Vlerësimit të Ofertave në prokurimet publike të Komunës.
