Shkencëtarët kanë shpikur një pajisje që mund të mbajë një tru të gjallë dhe të funksionojë i pavarur nga pjesa tjetër e trupit.
Studiuesit në Qendrën Mjekësore UT Southwestern në ShBA ishin në gjendje të izolonin rrjedhën e gjakut në trurin e një derri të anestazuar me ketaminë, ndërsa një algoritëm i kompjuterizuar ruante presionin e nevojshëm të gjakut, vëllimin, temperaturën dhe lëndët ushqyese që kërkon organi, raporton “Independent”,.
Ekipi i neurologëve raportoi se aktiviteti i trurit pa ndryshime minimale gjatë një periudhe pesë-orëshe, pavarësisht se nuk mori asnjë informacion biologjik nga pjesa tjetër e trupit.
Suksesi i eksperimentit mund të çojë në mënyra të reja për të studiuar trurin e njeriut pa ndikim nga funksionet e tjera trupore, sipas shkencëtarëve, ndërsa teknologjia hap potencialin për kryerjen e transplanteve të trurit në të ardhmen.
“Kjo metodë e re mundëson hulumtime që fokusohen në trurin e pavarur nga trupi, duke na lejuar t’u përgjigjemi pyetjeve fiziologjike në një mënyrë që nuk është bërë kurrë më parë”, tha Juan Pascual, profesor i neurologjisë, pediatrisë dhe fiziologjisë në Qendrën Eugene McDermott për Rritjen dhe Zhvillimin Njerëzor në UT Southwestern.
Sistemi i parë në llojin e tij, i referuar si një kontroll pulsativ ekstrakorporal i qarkullimit të gjakut (EPCC), është përdorur tashmë për të kuptuar më mirë efektet e hipoglikemisë në tru, pa pasur nevojë të merren parasysh faktorët e jashtëm.
Hulumtimi për sheqerin e ulët në gjak zakonisht përfshin kufizimin e marrjes së ushqimit të kafshëve laboratorike, ose dozimin e tyre me insulinë, megjithatë trupat e kafshëve kanë metodat e tyre natyrore për të kompensuar këta faktorë duke ndryshuar metabolizmin.
Izolimi i trurit në këtë mënyrë i lejoi studiuesit të studionin ndikimin e marrjes së lëndëve ushqyese pavarësisht nga mekanizmat natyrorë të mbrojtjes së trupit.
Hulumtimi u detajua në një studim, të titulluar “Mirëmbajtja e funksionit të trurit të derrit nën kontrollin pulsativ ekstrakorporal të qarkullimit të gjakut (EPCC)”, botuar në revistën Scientific Reports.
