Ambasada e Shqipërisë në Kosovë do të prezantohet me një godinë të re, punimet për ndërtimin e së cilës do të nisin shumë shpejt, pasi tashmë është miratuar dhënia e truallit.
Kuvendi Komunal i Prishtinës e ka miratuar sot dhënien e truallit për ndërtimin e Ambasadës së Shqipërisë në Kosovë.
Lajmin e ka bërë të ditur Ministri i Punëve të Jashtme i Shqipërisë Ditmir Bushati, i cili me anë të një postimi në rrjetin social “Facebook”, ka theksuar:
“Falë punës së mrekullueshme të Ambasadorit Qemal Minxhozi dhe bujarisë së Kryetarit Shpend Ahmeti dhe Kuvendit Komunal të Prishtinës sot është miratuar dhënia e truallit për ndërtimin e Ambasadës së Shqipërisë në Kosovë”.
Duke shprehur mirënjohje të thellë për të gjithë ata që e mundësuan këtë vendim, ministri Bushati shkruan se do të vijojmë “përpjekjet për të ndërtuar një ambasadë dinjitoze siç i ka hije një partneri strategjik të natyrshëm”.
