Agjencia për Regjistrim Civil e MPB-së, nga e hëna fillon lëshimin e certifikatave të gjendjes civile me elemente të avancuara të sigurisë në gjithë territorin e vendit.
Ministria e Punëve të Brendshme njofton qytetarët e Republikës së Kosovës, se që nga dita e hënë më 06 korrik të këtij viti, Agjencia për Regjistrim Civil e MPB-së, fillon lëshimin e certifikatave të gjendjes civile me elemente të avancuara të sigurisë në gjithë territorin e vendit.
Kjo nënkupton që është avancuar sistemi i pajisjes me dokumente të gjendjes civile, konform ndryshimit legjislativ dhe ngritjes së kualitet të të dhënave, si dhe ofrimit të shërbimit në mënyrë më efikase.
Me këtë rast, Ministria e Punëve të Brendshme po e përmbush edhe një ndër kriteret themelore të Udhërrëfyesit për Liberalizim të Vizave, thuhet në njoftimin e kësaj ministrie.
