Sot në Deçan, Lëvizja Vetëvendosje bëri prezantimin e Alternativës Qeverisëse dhe hapave kryesor të realizimit të saj. Në tubim morën pjesë Dardan Molliqaj, sekretar organizativ; Visar Ymeri, kryetar i grupit parlamentar dhe Albin Kurti, kryetar.
Molliqaj tha se VV ka qenë subjekti politik i cili e ka pasur analizën më të saktë në 9 vitet e fundit në Kosovë dhe për këtë madje pajtohen edhe kundërshtarët politikë të saj.
Visar Ymeri foli për situatë politike në vend dhe sfidat kryesore që po e presin Kosovën në ditët e ardhshme: zgjedhjet parlamentare, mandati i EULEX-it dhe gjykata ndërkombëtare e cila po paralajmërohet për Kosovën.
"Lëvizja Vetëvendosje qysh nga viti 2011 ka kërkuar rrëzimin e qeverisë dhe zgjedhjet e jashtëzakonshme. Sikur të përfillej kërkesa jonë, shumë të këqija që i kanë ardhur vendit nga kjo Qeveri, siç është marrëveshja e 19 prillit dhe pasojat e saj, Ligji për Amnisti dhe asociacioni i komunave serbe, nuk do të bëheshin. Kësisoj ka degraduar sovraniteti, integriteti territorial dhe rregullimi kushtetues i vendit", tha ai.
Sa i përket mandatit të EULEX-it dhe gjykatës apo tribunalit ndërkombëtar, të cilat sipas të gjitha gjasave do të votohen në seancën e Kuvendit të Kosovës, Ymeri tha se të dyja e dëmtojnë dhe e njollosin Kosovën.
"Neve nuk na është lejuar sistemi i pavarur gjyqësor në vend, por na janë imponuar misionet, e tash po na thuhet: juve ju duhet misioni ndërkombëtar dhe gjykata ndërkombëtare, sepse nuk keni sistem të pavarur gjyqësor. Përveç që na barazuan në Gjykatën e Hagës, duke na akuzuar të gjithëve nga pak, tani po na thonë se juve ju duhet një gjykatë të veçantë për të cilën as nuk e dimë kush do ta formojë, as kush do t'i emërojë gjyqtarët, kush do ta financojë dhe kujt do t'i japë llogari", përfundoi ai.
Albin Kurti, pasi i përshëndeti të pranishmit tha se Alternativa Qeverisëse e VV-së është alternativë e të gjitha qeverisjeve pas luftës, si shërbim për qytetarët dhe duke iu dhënë llogari atyre.
Ai paralajmëroi se me qeverisjen e Lëvizjes Vetëvendosje, TVSH-ja do të jetë zero për bukën, vajin, kripën, sheqerin, miellin, qumështin dhe librat. Ai gjithashtu foli edhe për rimëkëmbjen e industrisë prodhuese, të drejtat e punëtorëve dhe organizim sindikal, bujqësi të fortë që zëvendëson importet, arsim pa pagesë dhe i lidhur me ekonominë, sigurime shëndetësore publike, rritje e pensione si solidaritet midis gjeneratave, politikën e bashkimit të Mitrovicës dhe kombit, banka për zhvillim jo për fajde, sovranitet ekonomik mbi pasuritë natyrore dhe ligj për barazi dhe konfiskim të pasurisë së paligjshme.