Interi thuhet se ka rënë dakord për një çmim me Atletiko Paranaense për portierin Bento përpara verës së ardhshme. “Nerazzurrët” shitën Andre Onanën te Man. Junajtedi në verë për rreth 55 milionë euro dhe sollën veteranin Jan Zomer si zëvendësuesin e tij afatshkurtër.
Ndërsa portieri zviceran ka bërë mirë, ai do të mbushë 35 vjeç muajin e ardhshëm, duke e shtyrë klubin të fillojë të shqyrtojë idetë e tyre afatgjata.
Në verë, Interi shprehu hapur interesimin e tij për portierin Bento dhe dërgoi një ofertë për 24-vjeçarin. Në atë kohë, Atletiko Paranaense vendosi të refuzojë propozimin, por ata vlerësuan sjelljen e ekipit italian dhe bisedimet mes palëve nuk u ndalën me fillimin e sezonit.
Sipas “Calciomercato.com”, Interi tani ka rënë dakord për të drejtën e parablerjes me Atletiko Paranaense për Bento, në bazë të një marrëveshjeje me vlerë rreth 15 milionë euro. Ata kanë kohë deri në një datë të caktuar në verë për të konfirmuar nëse duan të zyrtarizojnë ofertën apo jo.
Portieri 24-vjeçar e ka pranuar tashmë se të luajë për klubin italian është ‘ëndrra e tij’, ndaj topi tashmë është në fushën e “Nerazzurrëve”.
