Kombet e Bashkuara konfirmuan të premten se bisedimet e këtij viti për klimën do të zhvillohen në Madrid, pasi Kili u tërhoq nga organizimi i tyre për shkak të protestave atje.
Shefja për klimën e OKB-së, Patricia Espinosa, tha se përfaqësuesit e shteteve do të mblidhen nga data 2 deri më 13 dhjetor në Madrid.
Presidenti i Kilit, Sebastian Pinera, tha të mërkurën se ka anuluar organizimin e konferencës për t'u përqendruar në rivendosjen e sigurisë në vend, pas disa javësh protesta, që lanë dhjetëra njerëz të vdekur.
Zyra e kryeministrit të Spanjës, Pedro Sanchez, u ofrua të enjten si nikoqire.
Qëllimi i konferencës është të jepen detaje për zbatimin e Marrëveshjes së Parisit për Ndryshimet Klimatike.
Në mesin e pjesëmarrësve do të jetë edhe aktivistja suedeze për klimën, Greta Thunberg, protesta e së cilës kundër ndryshimeve klimatike ka frymëzuar dhjetëra-mijëra njerëz në gjithë botën që të dalin në rrugë dhe të kërkojnë përpjekje më të mëdha nga liderët e tyre.
