Izraeli i ka akuzuar SHBA-të se po dorëzohet para terrorizmit, pasi regullatorët federal kanë ndaluar aeroplanët amerikanë që të fluturojnë drejt Tel Avivit për shkak të sulmeve me raketa nga Hamasi.
Ministri i Transportit të Izraelit, Yisrael Katz, ka thënë se aeroporti Ben Gurion është “i sigurt dhe në tërësi i mbrojtur”.
Vendimi amerikan për ndalimin e fluturimeve është marrë si përgjigje ndaj sulmeve me raketa të Hamasit që së fundi janë bërë afër aeroportit.
Mirëpo ministri Katz e ka quajtur ndalimin e përkohshëm amerikan të “panevojshëm” duke thënë se sistemi izraelit për detektimin e raketave ofron mbrojtje për fluturimet mbi Tel Avivin.
Ka pasur spekulime se ndalimi i fluturimeve është lëvizje e Vashingtonit për t’i bërë presion Izraelit.
Mirëpo Departamenti amerikan i Shtetit e ka hedhur poshtë këtë pretendim.