Të dhëna alarmante për të ardhmen e Ohrit, qendrës më të madhe turistike të vendit. Më shumë se 1000 të rinj largohen çdo vit nga qyteti dhe shkojnë për punë në Evropën Perëndimore dhe Amerikë. Qytetarët shprehen të shqetësuar nga zbrazja e qytetit, sidomos gjatë dimrit, ndërkohë që dhe vera duket gjithnjë e më shumë e braktisur. Sipas shifrave nga Enti Shtetëror për Statistikë, nga 1000 deri në 1200 njerëz e kanë lënë qytetit vit pas viti. Po ashtu, nëpër qendrat për gjuhë të huaja, rritet numri i qytetarëve që marrin orë mësimi për gjuhën gjermane.
“Tani ka filluar që shumë objekte banesore, shtëpi të tëra të zbrazen nëpër qytet. Si biznesmen, jam i shqetësuar sepse edhe po të kërkojmë tani kuadro të reja, Ohri nuk ka. Nuk e shoh Ohrin me perspektivë të mirë nëse nuk miratojmë ligje konkrete dhe kushte që të krijojmë kuadro këtu, dhe t’i kemi në dispozicion të kompanive”, tha Pavel Poposki, biznesmen nga Ohri.
Edhe nëpër Çarshi ka filluar mbyllja e dyqaneve. Pronarët thonë se nuk kanë qarkullim dhe fitime, për shkak të rënies së fuqisë blerëse të qytetarëve. Edhe qytetarët ndjehen të shqetësuar, pasi papunësia në këtë qytet arrin deri në 40 %.
“Në Maqedonia ka shpërngulje. Të rinjtë dalin për të punuar, këtu nuk ka punë. Për ta është më interesante jashtë, gjinden dhe i shfrytëzojnë vizat për 3 muaj”.
“Po dëgjoj se shpërngulen dhe kjo nuk është diçka e mirë. Si do të jetë më tutje, do të shohim. Më herët përveç turizmit edhe industria ishte e fuqishme. Të gjithë ishin të punësuar dhe Ohri ishte mes tre më të mirëve në Maqedoni, në fushën e industrisë. Tani është dobët, për fat të keq kemi ardhur deri në këtë situatë. Ndoshta 1% e popullit jeton, por për tjerët është vështirë”, thonë qytetarët.
Autoritetet lokale shpresojnë në një të ardhme më të mirë të Ohrit, me hapjen e zonës industriale mes Ohrit dhe Strugës, si dhe angazhimin e disa kompanive të huaja.
