Muzika, dizajni grafik, piktura, historia e artit, poezia, letërsia, kritika e artit, përkthimet, janë disa prej fushave që kanë bërë që Shyqri Nimanin të jetë mes yjeve. Një figurë që njihej mirë edhe si pedagog i fakultetit të arteve. Një yll, me të cilin vendi ynë mburrej.
Por jeta e tij, nuk ishte gjithnjë mes yjeve, edhe pse si duket, yjet e kishin përzgjedhur atë, për diçka më të madhe dhe e kishin mbajtur gjithnjë nën shndritjen e tyre.
I rritur mes gjembave, siç thotë në titullin e autobiografisë së tij, Shqyri Nimanin yjet e ruajtën dhe e morën në mesin e tyre, duke i shndritur rrugën jetësore që ai bëri deri sa arriti lart tek to.
Shyqri Nimani kishte lindur më 6 maj të vitit 1942 në Shkodër, por me prejardhje ishte nga Gjakova. Të dy prindërit e tij ishin lindur e rritur në Gjakovë, por jeta i shpuri në vende të ndryshme. Fillimisht ata u shpërngulën në Shkodër, ku lindën dy djemtë e tyre, Shyqriun dhe dy vjet më vonë vëllain e tij Gencin.
Shumë shpejt babai i Shyqriut vdiq nga një sëmundje në mushkëri në vitin 1945. Nëna i mbetet e ve dhe këtu jeta e Shyqriut ndërron shumë dhe atë, fatkeqësisht, për të keq.
Axhallarët e ndajnë nga nëna dhe gjyshja me të cilën jetonin, për ta marrë me vete në Prishtinë, ku nuk e mbajnë gjatë dhe e vendosin në jetimoren e fëmijëve në Prizren. Shyqriu rritet nëpër jetimore. Disa vjet në Prizren, pastaj në Kaçanik dhe në fund në Pejë.
Gjithsesi kjo jetë u ndryshua me rritjen e tij, ku falë talenteve të shumta, si në art, këngë, dizajn etj, Shyqri Nimani shndërrohet në yll.
Ai krijoi gjithsej 40 komponime origjinale që nga viti 1960 deri në vitin 1980, të regjistruara në Agjencinë Autoreske të Ish-Jugosllavisë dhe ka incizuar rreth 100 këngë për radio dhe TV. Po aq ka shkruar edhe tekste. Këngët e tij u shpërblyen në Akordet e Kosovës 4 herë. Ndër më të njohurat edhe sot mbesin, Iliriana, Adriatiku, Studenti dhe Dashuria etj.
Veprimtaria e profesor Shyqri Nimanit në fushën e eseistikës së arteve figurative aplikative është mjaft e gjerë. Ai është autor i shumë monografive, autor i librave shkollor, anëtar i jurive të rëndësishme profesionale kombëtare e ndërkombëtare etj.
Titulli i librit autobiografik të Nimanit - "Nëpër Gjemba Drejt Yjeve", nga latinishtja ‘Ad Astra Per Aspera’, që do të thotë përmes vështirësive te yjet - kap thelbin e rrugëtimit të jetës së Shyqri Nimanit si individ, por edhe si artist.
Shyqri Nimani mbetet në histori edhe për dorëshkrimin e artë në aktin themeltar të shtetit tonë, Deklaratën e Shpalljes së Pavarësisë së Kosovës.
Ai, sot, në moshën 82-vjeçe iku në botën e përjetshme duke lënë një trashëgimi të pasur për vendin tonë në fushën e artit dhe jo vetëm.
