Kryetari i Degës së Lidhjes Demokratike të Kosovës në Deçan Jeton Mushkolaj, ka kujtuar 20 vjetorin e Betejës së Loxhës.
Ai në një postim në Facebook, ka thënë se lavdia e Betejës së Loxhës ishte, është dhe do të mbetet Lavdia e Kombit, për një Kosovë të Lirë, të Pavarur dhe me miqësi të përjetshme me SHBA-të, përcjell Bota sot.
Postimi i plotë i Mushkolajt:
Përvjetori i 20-të i Betejës së Loxhës
Beteja e Loxhës, e cila ndodhi 20-të vite më parë, me plot të drejtë vlerësohet si njëra ndër betejat më të lavdishme të luftës sonë për Liri dhe Pavarësi. Në këtë betejë u dëshmua se sinergjia ndërmjet të drejtës, dijes dhe guximit ishte epilogu më real i fitores sonë, respektivisht i humbjes më të madhe të armikut.
Këtë betejë të lavdishme me plot kompetencë e udhëhoqi kolonel Tahir Zemaj, ndërsa luftëtarët të cilët ranë për të mos vdekur kurrë ishin: Rrustem Bruqi, Lumni Surdulli dhe Enver Alaj, të cilëve së bashku me bashkëluftëtarët e tjerë iu jemi mirënjohës përjetë për veprën e tyre heroike dhe kombëtare.
Lavdia e Betejës së Loxhës ishte, është dhe do të mbetet përherë Lavdia e Kombit, për një Kosovë të Lirë, të Pavarur dhe me miqësi të përjetshme me SHBA!
Lavdi!