Një grabitje e një banke ka ndodhur në Tiranë, ku të paktën 19 milionë lekë të reja mendohet të jenë grabitur. Grabitësit e kanë realizuar vjedhjen e tyre nëpërmjet murit të bankës, duke bërë realitet skenaret e filmave hollivudjanë.
Autorët e kësaj ngjarje kanë mundur të çajnë murin e bankës pikërisht në dhomën nën tokë, ku ishte vendosur kasaforta. Kurse, Policia ka konstatuar se punimet për çarjen e murit të bankës ishin kryer brenda një ambienti tjetër privat, nën tokë, që ishte pranë bankës dhe që dikur ka shërbyer si kazino.
Mendohet se autorët kanë hyrë në ish-ambientet e kazionosë duke prerë hekurat dhe më pas kanë punuar të qetë të paktën për tre netë me radhë për hapjen e murit, hapje e cila kishte përmasat 50 me 30 cm, mëse e mjaftueshme për futjen e një njeriu.
Pas hapjes së murit, autorët, duke përdorur edhe lëndë të ndryshme kimike, kanë hapur edhe kasafortën nga ku kanë marrë të paktën 19 milionë lekë të reja.