Ka dështuar raportimi i drejtorit të Inteligjencës, Agron Selimaj, në Komisionin për Mbikëqyrjen e Agjensionit Kosovar për Intelegjencë. Në këtë mbledhje, Selimaj është dashtë të jap shpjegime për gjendjen e sigurisë në vend.
Mbledhja dështoi për shkak të mungesës së kuorumit, mungesë kjo e opozitës, e cila po bojkoton mbledhjet e komisioneve, dhe e zëvendëskryetares Duda Bajle, e cila ka njoftuar deputetët se nuk mund të marrë pjesë në komision, meqë ka probleme shëndetësore.
Javën e kaluar, Komisioni për mbikëqyrjen e Agjensionit Kosovar për Inteligjencë, ka kërkuar nga ky agjension që të dërgoi ndonjë zyrtar për të raportuar në komision për gjendjen e sigurisë në vend, pas disa incidenteve të fundit në vend.
Arrestimi i katër personave te Manastiri i Deçanit, eksplozivi në xhaminë në Drenas, si dhe gjendja e sigurisë në përgjithësi, janë pikat që komisioni pati kërkuar shpjegime nga AKI.
Deputetët kanë konsideruar se për gjendjen e sigurisë në vend po informohen nga mediat, andaj është i nevojshëm raportimi.
Për këtë mbledhje raportimi i drejtorit të AKI-së ka qenë pika e vetme e rendit të ditës.