Edhe në veri, edhe në jug të Mitrovicës, policia ka plane operative për të parandaluar trazirat që mund të shkaktojë ndeshja Shqipëri-Serbi.
Rreth 120 policë të stacionit të Mitrovicës së Veriut do të jenë të gatshëm për parandalimin e ndonjë tensioni të mundshëm, para, gjatë dhe pas ndeshjes Shqipëri-Serbi e cila do të zhvillohet sonte në Elbasan.
Zëvendësdrejtori i Policisë në Mitrovicën e Veriut, Besim Hoti, për KALLXO.com tregoi detajet e planit policor.
“Stacioni i Veriut sot është me plan operativ i cili do fokusohet më shumë përgjatë lumit Ibër, të ura kryesore e këtij lumi, Lagjja e Boshnjakëve, te tre rrokaqiejt dhe në Suhodoll, gjithashtu edhe në qytet,” shpjegoi Hoti.
Plan operativ kanë edhe kolegët e Hotit në jug të Mitrovicës. Avni Zahiti, zëdhënës i Policisë për Mitrovicën e Jugut thotë se ura e Ibrit do të jetë njëra nga zonat që policia do ta ketë nën vëzhgim.
“Lidhur më ngjarjen e sotme e kemi një plan operativ ku varësisht nga reflektimi i rrjedhës së lojës atje, ne në fokus kemi zonat e ndjeshme si ura e Ibrit e të ngjashme”, tha Zahiti.
Shqipëria e Serbia do ta zhvillojnë sonte ndeshjen e dytë në kuadër të kualifikimeve për Kampionatin Evropian “Francë 2016”
