Avokati i Popullit, Hilmi Jashari ka vizituar sot Shoqatën e të Verbërve të Kosovës(SHVK) ku edhe është takuar me kreun e kësaj organizate që përfaqëson komunitetin e personave të verbër në gjithë territorin e Kosovës.
Avokati i Popullit është interesuar për kushtet në të cilat kjo shoqatë e zhvillon aktivitetin e vet duke u interesuar për vështirësitë dhe barrierat me të cilat ballafaqohen qytetarët me aftësi të kufizuar.
Jashari e ka njoftuar kryetarin e SHVK për hyrjen në fuqi të Ligjit për mbrojtje nga diskriminimi, i cili i jep kompetenca shtesë Avokatit të Popullit dhe mundësi më të mëdha në mbrojtjen e kategorive të diskriminuara.
Avokati i Popullit i ka dorëzuar Shoqatës së të Verbërve të Kosovës një sasi të konsiderueshme të një buletini informues me Alfabetin e Brajlit, i përgatitur veçanërisht nga AP, i cili përmban të dhëna mbi kompetencat dhe përgjegjësitë e Institucionit të Avokatit të Popullit, transmeton Klan Kosova.
Kreu i SHVK-së është shprehur se do do të shpërndajë materialin tek anëtarësia e vet si mundësi që kjo kategori e qytetarëve të Kosovës të dijë më tepër për rolin dhe mandatin e Avokatit të Populli, si kategori kushtetuese që mbikëqyr dhe mbron të drejtat dhe liritë e individëve nga veprimet apo mosveprimet e paligjshme dhe të parregullta të autoriteteve publike.
Në takim u tregua gatishmëri e dyanshme për bashkëpunim edhe më të afërt, me qëllim të ofrimit të shërbimeve sa më të mira, me theks të veçantë qytetarëve me aftësi të kufizuara.
