Instituti për Politika Zhvillimore (INDEP) dhe Friedrich Ebert Stiftung (FES) organizojn tryezën me titull “Pse migrojnë Kosovarët?”.
Në tryezë do të prezantohen gjetjet e hulumtimit të realizuar nga INDEP, të titulluar “Një vështrim mbi imigrimin e kosovarëve në BE: imigrimi si dukuri shumëdimensionale” si dhe gjetjet e hulumtimit të realizuar nga FES, i titulluar “Fluksi i migracionit drejt Evropës-Njerëzit, arsyet dhe mënyrat”.
Punimi “Një vështrim mbi imigrimin e kosovarëve në BE: imigrimi si dukuri shumëdimensionale” shtjellon kontekstin historik si dhe informata të tjera ndihmëse lidhur me forcat që e nxitin emigrimin nga Kosova dhe më pas analiza fokusohet tek eksodi i periudhës 2014-2015.
Po ashtu, në punim elaborohen kontributi i diasporës kosovare, migrimi me qëllim të punësimit dhe kontributi i remitencave në zhvillimin njerëzor dhe përmirësimin e mirëqenies në vend - dhe si lidhen këto dukuri me valën e fundit të emigrimit.
Ndërsa punimi i FES shpalos trendet e migracionit të fundit, duke pasqyruar të dhëna direkte nga fluksi i fundit i njerëzve të cilët personalisht po ndiqnin rrugën e emigrimit, gjatë periudhës prej 8-14 shkurt, ose të atyre të cilët tashmë ishin vendosur nëpër kampet e refugjatëve në Gjermani gjatë muajit shkurt, por të cilët ishin larguar nga Kosova gjatë valës së migrimit të muajve janar-shkurt.
Të dhënat nxjerrin raste të cilat mund të konsiderohen tipike dhe të pasura me informata, si njësi të analizës dhe si kontekst në të cilin ato janë gjetur.