Kryetari i Kuvendit të Kosovës, Kadri Veseli në takim me zëvendëskryeministrin malazez, Dushko Markoviq, ka vënë në pah se Kosova dhe populli i saj çmon vlerat e fqinjëve të vet dhe ka dëshmuar se është e vendosur për respektimin dhe ndërtimin e fqinjësisë së mirë me të gjitha shtetet e rajonit, ashtu siç është i përkushtuar edhe Mali i Zi.
Bashkëbiseduesit vlerësuan se bashkëpunimi i mirë fqinjësor është vlerë e përcaktimit në rrugën e përbashkët euroatlantike.
“Kosova dhe institucionet e saj janë të vendosura të zhvillojnë fqinjësinë e mirë ndërshtetërore në rajon dhe më gjerë, duke respektuar dhe konsideruar pakicat si vlera dhe ura lidhëse në mes të shteteve, ndërsa të drejtat e minoriteteve si vlera universale”, theksoi Veseli dhe vuri në pah rëndësinë e bashkëpunimit për zhvillimet në rajon në veçanti bashkëpunimin ekonomik.
Markoviq shprehu respekt për punën dhe bashkëpunimin ndërshtetëror, duke theksuar se agjenda e zhvillimit ekonomik mbetet prioritet për rajonin dhe përkushtimin në rrugën e përbashkët të integrimeve rajonale dhe globale.
Zëvendëskryeministri malazez konfirmoi përkrahjen e shtetit të tij për rrugëtimin e Kosovës në procesin e integrimit evropian të saj, duke ofruar edhe përvojën e Podgoricës zyrtare në këtë drejtim.
Bashkëbiseduesit diskutuan edhe për demarkacionin e kufirit, evidentimin e malaziasve si kategori kushtetuese në Republikën e Kosovës, si dhe bashkëpunimin në fushën ekonomike dhe ngritjen e cilësisë së jetës së qytetarëve të të dyja vendeve.
