Në Pallatin e Drejtësisë nuk funksionon si duhet sistemi i ventilimit, madje Prokurorja Ferdane Sylejmani të mërkurën u dërgua në Emergjencë pa vetëdije.
Kështu raporton RTV 21, ku njofton se ajo ka pësuar edhe lëndime trupore.
Shkas i gjithë kësaj situate prokurorët thonë se është mungesa e ajrit dhe oksigjenit në ambientet e punës.
Të shqetësuar me këtë rast janë të gjithë prokurorët e Prokurorisë Themelore dhe vlerësojnë se duhet masa urgjente në përmirësimin e ambientit të punës, përndryshe sipas tyre, po keqësohet gjendja shëndetësore e punëtorëve në mungesë të ajrit dhe ventilimit jo efikas.
Prokurorja e lënduar në vendin e punës Ferdane Sylejmani pas trajtimit në Klinikën Emergjente, po trajtohet në shtëpi.
Në gjykatat dhe prokuroritë që janë vendosur në Pallatin e Drejtësisë thonë se edhe pas një muaj problemet teknike janë evidente.
Mungesa e ajrit, mosfunksionimi i tualeteve, ashensorëve pengojnë realizimin e detyrave të punonjësve.