Zëvendëskryeministri i parë i Kosovës, Hashim Thaçi ka vazhduar vizitat e tij nëpër komuna të Kosovës. Ai sot ka takuar kryetarin e Komunës së Shtimes, Naim Ismailin.
Pasi ka përgëzuar kryetarin e Shtimes për të arriturat e kësaj komune, zëvendëskryeministri Thaçi ka folur edhe për paralajmërimet e partive opozitare për të organizuar protestën e radhës të merkurin.
Thaçi ka thënë se protestat janë një e drejt demokratike, mirëpo ka theksuar se nëse opozita ka argumente politike, ato t’i shpreh në Kuvendin e Kosovës.
“Debati në Kuvendin e Kosovës nuk mund të zëvendësohet as me protesta, as me dhunë, as me shufra metalike. Është koha që të ulemi bashkërisht të debatojmë në Kuvendin e Kosovës, t’i shtyjmë prioritet që janë në interes të qytetarëve të Kosovës, në fokusohemi në krimin e vendeve të punës, në zhvillimin ekonomik”, ka thënë Thaçi.
I pyetur për deklaratat e politikanëve serb, se ata mund të zëvendësojnë sa herë donë ministrat në Kosovë, Thaçi ka thënë është mirë që fokusi mos të jetë në deklaratat e liderëve serb.
Sipas tij, politikanët serb tashmë kanë dëshmuar se humbjet e tyre i festojnë si fitore.
