Ambasadorja e Francës në Kosovë, Maryse Daviet ka deklaruar se do të përkrah fuqishëm përpjekjet e Universitetit të Prishtinës (UP) “Hasan Prishtina” për ngritjen e cilësisë si parakusht për integrimin e arsimit të lartë të Kosovës në hapësirën evropiane të arsimit të lartë.
Këto komente ambasadorja franceze i ka bërë në takim me rektorin e UP-së Ramadan Zejnullahu, gjatë vizitës që ka realizuar sot në këtë universitet ku është njoftuar me rrjedhat aktuale.
Ambasadorja Davies e ka përgëzuar rektorin Zejnullahu për zgjedhjen e tij në postin e rektorit, siç e ka quajtur ajo “rektori i parë i cili vjen në post për shkak të kritereve akademike e jo preferencave politike”.
“Në proceset nëpër të cilat po kalon arsimi i lartë në Kosovë, duhet angazhim më i shtuar për cilësi të studimeve në të gjitha nivelet, pa u ndërmarrë hapa që e cenojnë autonominë e Universitetit dhe e dëmtojnë pariparueshëm rrugën e integrimit në Procesin e Bolonjës”, ka thënë Davies.
Ndërsa, rektori Zejnullahu e ka njoftuar nga ana e tij ambasadoren Davies se në UP po ballafaqohen me vështirësi të shumta si në planin financiar, të infrastrukturës hapësinore dhe laboratorike ashtu edhe me mungesën e stafit akademik për ta përballuar një numër kaq të madh të studentëve sa ka aktualisht.
“Studimet në vitin e parë akademik kanë filluar para gati dy muajsh dhe menaxhmenti i UP-së po bën gjithçka që ta rris cilësinë në të gjitha nivelet me synimin kryesor që të jemi universitet konkurrues brenda hapësirës evropiane të Arsimit të lartë”, ka thënë rektori në takim.
