Nuk është realizuar as minimumi i premtimeve kolosale gjatë fushatës zgjedhore të LDK-së në Pejë dhe kryetarit të saj, Gazmend Muhaxheri. Kështu ka vlerësuar Dega e AAK-së në Pejë, në një konference për media, që udhëhiqej nga ish-kryetari i Komunës së Pejës, Ali Berisha
Aleanca për Ardhmërinë e Kosovës në Pejë, ka prezantuar monitorimin që e ka zhvilluar gjatë këtyre 100 ditëve të para të qeverisjes lokale, duke përcjellur punën e organeve komunale në Komunën e Pejës, e cila tash udhëhiqet nga Gazmend Muhaxheri (LDK, në partneritet me Partinë Demokratike të Kosovës dhe Partinë e Drejtësisë.
AAK ka konstatuar një seri dështimesh të këtij koalicioni, i cili, sipas AAK-së nuk solli asgjë konkrete në dobi të qytetarëve. Sipas AAK-së, qeveria e Gazmend Muhaxherit nuk ka plan qeverisës e as ekspertë, të cilët i kishte premtuar gjatë fushatave elektorale.
“Fillimi i punës së kësaj qeverisje, e cila nuk ka plan qeverisës fare dhe as ekspert të premtuar, me vendimet arbitrare me largimin nga puna të shërbyesve civilë me marrëdhënie kontraktuale pune, si dhe punësimi i militantëve partiakë pa asnjë konkurs, ishin hapat e parë të kësaj qeverie lokale”, thuhet në komunikatën e lëshuar nga konferenca për media e AAK-së në Pejë.
Sipas AAK-së, ky subjekt opozitar ka nxitur përshpejtimin e formimit të qeverisë nga LDK-ja, vonesa e së cilës për mbi 50 ditë nga dhënia e betimit të kryetarit Muhaxheri ka stagnuar proceset zhvillimore ne Komunën e Pejës. Ndërsa, ky përshpejtim i formimit të qeverisë nga pushteti aktual solli drejtorë nëpër drejtoritë përkatëse, të cilët u zgjodhën pa kritere të kërkuara profesionalizmi.
AAK-ja thotë se kryetari aktual i Komunës së Pejë, Gazmend Muhaxheri vonoi në fillimin e realizimit të punëve kapitale, duke u justifikuar me borxhe të cilat janë demantuar tashmë edhe me dokumente zyrtare madje edhe publikisht.
AAK ka riktheksuar se punët e pakryera nuk janë borxhe si dhe shuma e këtyre borxheve është afër 500 mijë euro, por është lënë buxhet në arkën shtetërore për të paguar këtë shumë me afër 600 mijë euro.
Ndër dështimet e renditura nga AAK-ja, sipas kryetari të kësaj dege në Pejë, është edhe mos realizimi i premtimit përrrikthimin e punëtorëve të shërbyesve të sigurimit dhe pastrimit nga kompanitë private në sherbyes civil, në afatin e premtuar Brenda tre muajve.
“Procedura e emërimit të drejtorëve të shkollave u bë në mënyrë të atillë, duke emëruar persona partiak të partive në pushtet, përderisa Muhaxheri gjatë fushatës kishte premtuar se do ta depolitizonte arsimin... Mbyllja e orareve të punës 24 orëshe nëpër qendra mjekësore familjare në Komunën e Pejës radhitet njëri nga dështimet ne sektorin e shëndetësisë, si dhe shkarkimi i drejtorit të QKFM-së në Pejë në mënyrë arbitrare, përderisa ai ishte ardhur me aproimin e Kuvendit Komunal”, thuhet në komunikatën.
Sipas AAK-së, drejtorati i urbanizmit lejon ndërtime të egra pa leje, për rastet e personave të afërt me pushtetin lokal. “ Bujqësia është vetëm njëri nga sektorët të cilat po vuan nga keqmenaxhimi i kësaj qeverisje të dështuar. Ai nuk bëri asnjë hap që jap shenjë se po investon në bujqësi”.
AAK përmend pasigurinë dhe shtimin e rasteve kriminale dhe vrasjeve. “Ndërsa premtim kryetarit Muhaxxheri ishte evitimi i këtyre rasteve, si dhe në pyetjen e gazetarëve nëse kryetari aktual është parë ndonjëherë në vendin e ngjarjes të ndonjë rasti tragjik, sikur kishte premtuar në fushatë, përgjigjja ka qenë negative”.
“Komuna e Peja ka stagnuar funksionimin e saj në sistemin digjital në Administratën Publike për të shërbyer qytetarët, ndërsa në anën tjetër projektet rinore realizohen nëpër qendra rinore private, (rasti i Qendrës rinore ‘At Lorenc Mazreku”, që menaxhohet nga drejtori i Drejtorisë së Kulturës në Pejë), duke centralizuar projektet tek njerëzit e pushtetit si dhe ka bërë që të mbyllen qendrat rinore publike sikurse është rasti tek Kompleksi Rinor Publik ‘Peja’’’, thotë komunikata.
Sipas AAK-së, shumë organizata sportive rrezikojnë suksesin në pjesëmarrjen e garave, si në vend ashtu edhe jashtë, duke rrezikuar shuarjen dhe stagminin e sukseseve të mëparshme, nga mungesa e përkrahjes komunale.
“Qeverisja aktuale po e u bën presion shërbyesve civilë me kërcënim për përjashtim nga puna.Q everia e re komunale e Pejës dhe Gazmend Muhaxheri duke tentuar të korrin suksese në kursimin e fondeve të buxhetit kanë sjellur dëme në sjelljen efikase të shërbimeve qytetare”, thuhet në komunikon e AAK-së.
“I garantojmë qytetarëve të Pejës se Aleanca për Ardhmërinë e Kosovës do jetë gjithmonë mbikëqyrëse e kësaj qeverie të dështuar, e cila ka mashtruar qytetarët gjatë fushatës. Aleanca nuk do ndalet së punuari në të mirë të qytetarëve siç ka bërë gjithnjë qoftë në pozitë ose opozitë”, përfundon kumtesa.
