Graham Potter mori drejtimin e Chelsea dhe te Brighton kanë një mision të vështirë për të gjetur trajnerin e ri. Gjatë këtyre ditëve kanë qarkulluar shumë emra, por ende nuk ka një marrëveshje.
I fundit që ka dalë si opsion është trajneri Abel Ferreira i Palmeiras. “UOL” shkruan se Brighton i ka nisur tentativat për ta bindur teknikun portugez të ekipit brazilian.
Ferreira ka fituar dy Kupa Libertadores, 2020, 2021, me klubin brazilian dhe është shpallur trajneri më i mirë në të dy sezonet në këtë kompeticion.
Kontrata e tij me Palmeiras është e vlefshme deri në vitin 2024, por Brighton dëshiron ta marrë tani Abel Ferreiran, i cili nga ana tjetër ka shprehur dëshirën të qëndrojë dhe të fitojë titullin kampion me Palmeiras.
Trajneri 43-vjeçar e ka nisur karrierën me moshat e Sporting, për të kaluar më pas në krye të ekipit B. Përkohësisht ai drejtoi skuadrën e Braga, ndërsa më pas u bë trajner me kohë të plotë në këtë ekip në periudhën 2017-2019, para se të kalonte te PAOK. Një vit me grekët dhe nga viti 2020 drejton Palmeiras në Brazil.
