LIVE: Autokolona e Zelenskyt për pak u godit nga një raketë ruse - Organizatorja ruse e zgjedhjeve vritet në një shpërthim

Raketat balistike goditën Odesën sot, gjatë vizitës së kryeminsitrit grek për t’u takuar me presidentin ukrainas Zelensky.

Kreu i administratës ushtarake rajonale të Odesa, Oleg Kiper, u bëri thirrje banorëve të qytetit të qëndrojnë në strehimore.

Alarmi është lëshuar në të gjithë Odesën për bombardime ajrore.

Shpërthimi ndodhi ndërsa autokolonat e Volodymyr Zelensky dhe Kyriakos Mitsotakis ishin në lëvizje.

Një grua që po ndihmonte qeverinë ruse të organizonte zgjedhjet në Berdiansk të pushtuar u vra në një shpërthim të dukshëm me makinë bombë, raportoi në Telegram më 6 mars Viktoriia Halitsina, kreu i Administratës Ushtarake të Qytetit Berdiansk, përcjell Bota sot.

Berdiansk ndodhet në bregun e Detit të Zi në Zaporizhzhia Oblast, rreth 65 kilometra në jug-perëndim të Mariupolit.

Sipas Halitsina, gruaja quhej Olena Ilina dhe ishte një anëtare lokale e komisionit zgjedhor të pushtimit rus.

Rusia do të mbajë zgjedhjet presidenciale midis 15 dhe 17 marsit, në të cilat presidenti Vladimir Putin, i cili është në pushtet që nga viti 1999, pritet të sigurojë mandatin e tij të pestë në detyrë. Rusia planifikon të kryejë votime në territoret e pushtuara të Ukrainës, në kundërshtim me të drejtën ndërkombëtare.

Një mjet shpërthyes dyshohet se shpërtheu kur Ilina hipi në makinën e saj. Mësohet se ajo ka ndërruar jetë nga plagët e marra në spital.

Një kanal Telegram i lidhur me forcat pushtuese ruse në Berdiansk ndau një video të asaj që supozohej se ishte makina e dëmtuar e Ilinës, duke pretenduar se një pajisje shpërthyese e improvizuar ishte vendosur poshtë automjetit.

Halitsina paralajmëroi banorët vendas në qytetin e pushtuar të jenë të kujdesshëm, pasi Rusia ka të ngjarë të rrisë numrin e forcave të saj në qytet. Ajo gjithashtu paralajmëroi banorët që të shmangin turmat e mëdha dhe qendrat e votimit.

Rusia ka thënë se nuk i njeh urdhërarrestet e lëshuara nga Gjykata Penale Ndërkombëtare (GJNP) për dy komandantët kryesorë rusë lidhur me krimet e dyshuara të luftës në Ukrainë.

Gjenerallejtnant Sergei Kobylash dhe Viktor Sokolov – admiral i marinës, janë dy komandantët ndaj të cilëve janë lëshuar urdhërarrestet të martën.

“Ne nuk jemi palë në statutin e [Romës] – ne nuk e njohim këtë”, ka thënëzëdhënësi i Kremlinit Dmitry Peskov.

Është hera e dytë që lëshohen urdhërarreste për rusët për luftën në Ukrainë.

E para ishte për presidentin Vladimir Putin dhe të dërguarën e tij për të drejtat e fëmijëve.

“Ky nuk është vendimi i parë. Ne gjithashtu e dimë se ka procese të ndryshme të mbyllura që po ndodhin atje, të cilat mbahen të fshehta dhe ne i trajtojmë vendimet e tilla në përputhje me rrethanat”, ka shtuar Peskov.

Peskovi ka thënë se fakti që Rusia nuk ishte nënshkruese e Statutit të Romës, traktatit ndërkombëtar që krijoi GJNP-në, do të thotë se Rusia nuk i njeh urdhërarrestet.

Nuk ka gjasa që shtetasit rusë të ekstradohen për t’u përballur me akuza.

Rreth 20.000 trupa të Organizatës së Traktatit të Atlantikut Verior (NATO) kaluan lumin Vistula, në Poloninë veriore, si pjesë e një stërvitjeje ushtarake, të quajtur Dragon 24.

Manovra është pjesë e operacionit Steadfast Defender të aleancës, i cili përfshin rreth 90.000 trupa nga të 31 vendet anëtare të NATO-s dhe nga Suedia.

Ky operacion është më i madhi i NATO-s që nga Lufta e Ftohtë, dhe ka për qëllim të shfaqë solidarizimin mes vendeve anëtare në mes të rritjes së shqetësimeve për sigurinë, si pasojë e pushtimit në shkallë të gjerë të Ukrainës nga ana e Rusisë.

Dy dronë ukrainas kanë goditur rezervuarët e karburanteve në një nga fabrikat më të mëdha të hekurit të Rusisë, ndërkaq raportohet se nuk ka të lënduar, shkruan Reuters.

Guvernatori i Kurskut, Roman Starovoit tha se droni i dytë ka goditur fabrikën e mineralit të hekurit Mikhailovsky GOK që është në pronësi të Metalloinvest, prodhuesit më të madh të mineralit të hekurit në Rusi.

Ai tha në rrjetet sociale se radarët e mbrojtjes kundërajrore janë aktiv, dhe u bëri thirrje qytetarëve të jenë të qetë.

E një video e postuar në Telegram, shfaq tymin e zi duke u ngritur në qiell pasi kjo fabrikë u godit me dron.

Starovoit ka akuzuar Kievin për sulmet në fabrikë në rajonin e Kurskut, që gjendet vetë 90 kilometra larg kufirit me Ukrainën.

Dronët ukrainas shpesh godasin rafineritë e naftës ruse, dhe infrastrukturën ekonomike të shtetit që filloi pushtimin e Ukrainës dy vite më parë.

Zëdhënësi i Këshillit të Sigurisë Kombëtare të SHBA-së, John Kirby deklaroi të martën se Ukraina nuk kërkon ushtarë të huaj, por mjete për të luftuar Rusinë.

“Nuk do të ketë ushtarë amerikanë në territorin e Ukrainës. A e dini pse? Kjo nuk është ajo që kërkon presidenti Zelensky. Kërkon mjete dhe veçori. Ai kurrë nuk kërkoi që ushtarë të huaj të luftonin për vendin e tij”, tha Kirby.

Më herët sot, Macron, nga Praga ku u takua me presidentin çek Petr Pavel, tha se e ndjente se ishte e nevojshme për t’i dhënë një shtysë aleatëve të Ukrainës, të cilët ai i quajti të mos u turpërohen përballë një Rusie “të pandalshme”.

Ai tha gjithashtu se merr përgjegjësi për deklaratat e tij të fundit të diskutueshme për dërgimin e trupave perëndimore në Ukrainën e shkatërruar nga lufta. Sa i përket dërgimit të trupave, shumica e vendeve perëndimore tashmë e kanë bërë të qartë se nuk po e konsiderojnë një skenar të tillë.

Një video e filmuar nga ajri shfaq momentin kur forcat ukrainase arrijnë të shkatërrojnë tankun e avancuar rus T-90 gjatë një sulmi me dron.

Videoja 17-sekondëshe e filmuar nga droni dhe e shpërndarë në rrjetet sociale nga ministria ukrainase e Mbrojtjes, është filmuar nga Brigada e 92 e ushtrisë ukrainase.

Në të shfaqet shënjestrimi i tankut rus nga forcat e Kievit në një lokacion të panjohur, si dhe shfaqen pamjet nga një kënd tjetër, ku shihet makineria ruse duke u hedhur në erë.

That's a firework!
An FPV drone destroyed a Russian T-90 tank worth $4.5 million.

📹: 92nd Assault Brigade pic.twitter.com/BS8OxfbWHl

— Defense of Ukraine (@DefenceU) March 5, 2024

T-90 konsiderohet nga rusët si një tank i avancuar që po përdoret në luftën në Ukrainë. Sipas ministrisë ukrainase të Mbrojtjes, ky tank kushton 4.5 milionë dollarë.

Presidenti Volodymyr Zelensky gaboi kur shkarkoi gjeneralin e lartë të Forcave të Armatosura të Ukrainës, Valery Zaluzhny, tha kryetari i bashkisë së Kievit, Vitaly Klitschko.

Zelensky shkarkoi Zaluzhny muajin e kaluar, duke përmendur nevojën për “një ndryshim në strategji”. Gjenerali Aleksandr Syrsky u emërua pasardhës i tij.

“Largimi i tij ishte një gabim i madh. Ne duhet të bashkohemi rreth njerëzve që kanë mbështetjen më të lartë, si Zaluzhny që ka vlerësimin më të lartë në sondazhe”, tha Klitschko për të përditshmen italiane La Repubblica.

“Për dy vjet ai kishte mbrojtur me sukses vendin tonë kundër ushtrisë më të madhe dhe më të fuqishme në botë,” tha ish-boksieri profesionist, duke shtuar se publiku e sheh gjeneralin e famshëm si “mbrojtësin më të rëndësishëm të kombit”.

Klitschko, i cili ka akuzuar Zelenskyn për “autoritarizëm” në të kaluarën, argumentoi se presidenti “duhej të shpjegonte pse e mori vendimin që tronditi çdo ukrainas” sepse “shumë u ndjenë të hutuar dhe të dëshpëruar”.

Ukraina pretendoi të martën se ka fundosur një tjetër luftanije ruse në Detin e Zi, duke përdorur dronë detarë të teknologjisë së lartë, ndërsa forcat e Kievit vazhdojnë të godasin objektivat thellë prapa vijës së frontit të luftës. Autoritetet ruse nuk e kanë konfirmuar fundosjen e luftanijes.

Agjencia e inteligjencës ushtarake ukrainase tha se një njësi e operacioneve speciale shkatërroi luftanijen e madhe të patrullimit “Sergey Kotov” gjatë natës. Luftanija, për të cilën Ukraina tha se ishte aktivizuar në vitin 2021 dhe u godit pranë ngushticës së Kerçit, thuhet se ishte e pajisur me raketa me vetëdrejtim dhe kishte rreth 60 anëtarë të ekuipazhit.

Fundosja e një anijeje kaq moderne do të ishte një humbje e konsiderueshme dhe një goditje e rëndë për Moskën, ndonëse ajo ka dhjetëra anije të tjera në flotën e saj të Detit të Zi.

Anijet patrulluese si “Sergey Kotov” janë pjesë e operacioneve të Rusisë kundër sulmeve me dronë, sipas një artikulli të botuar muajin e kaluar nga Institutit amerikan të Studimit të Politikës së Jashtme. Anijet përdorin radar dhe një helikopter për të zbuluar dhe shkatërruar dronët duke përdorur granatahedhës dhe mitralozë të rëndë, tha Instituti amerikan i Studimit të Politikës së Jashtme.

Forcat e Kievit po përpiqen të mbajnë larg ushtrinë ruse të pajisur më mirë në disa pika përgjatë vijës së frontit kryesisht të pandryshuar prej 1,500 kilometrash, por gjithashtu po godet objektiva në distanca të largëta nga fusha e betejës.

Në Detin e Zi, sukseset e Ukrainës kundër luftanijeve ruse kanë mundësuar krijimin e një korridori për eksportin e grurit ukrainas.

Ministria e Mbrojtjes e Ukrainës postoi në X një video, që thoshte se ishte nga sulmi ndaj luftanijes “Sergey Kotov” me një anije pa ekuipazh “Magura V5” të mbushur me ekzploziv, të prodhuar nga Ukraina. Shtatë anëtarë të ekuipazhit rusë u vranë dhe gjashtë u plagosën në sulm, ndërsa 52 anëtarë të ekuipazhit u shpëtuan, tha agjencia e inteligjencës ushtarake të Ukrainës.

Pretendimet e Ukrainës nuk mund të verifikoheshin menjëherë në mënyrë të pavarur dhe dezinformimi ka qenë pjesë e luftës, që kur Rusia nisi sulmin në shkallë të gjerë të Rusisë më 22 shkurt 2022 ndaj Ukrainës.

Firma private e sigurisë “Ambrey” tha se sulmi ndodhi në portin e Feodosias, në Krime, që Rusia e aneksoi në 2014. Zyrtarë të firmës “Ambrey” thanë se kishin parë pamjet e marra nga një anëtar i ekuipazhit në një anije tregtare në port, që tregonin luftanijen “Sergej Kotovin” duke qëlluar në drejtim të dronëve.

Anija u godit të paktën dy herë, me goditjen e dytë që rezultoi në një shpërthim të madh, tha firma “Ambrey”.

Muajin e kaluar, Ukraina pretendoi se kishte fundosur dy luftanije ruse, duke përdorur dronë. Më 1 shkurt, ajo pretendoi se kishte fundosur luftanijen ruse “Ivanovets” dhe më 14 shkurt ajo tha se shkatërroi anijen “ Caesar Kunikov”. Zyrtarët rusë nuk i kanë konfirmuar këto pretendime.

Zyrtarët e Kievit thonë se rreth 20% e sulmeve me raketa ruse në Ukrainë janë kryer nga Deti i Zi dhe goditja e anijeve ruse atje është e turpshme për Moskën.

Pothuajse dy vjet më parë, anija kryesore e flotës ruse të Detit të Zi, “Moskva”, e cila ishte e pajisur me raketa me vetëdrejtim, u fundos pasi u dëmtua rëndë në një sulm me raketa.