Aktgjykimi i Gjykatës Kushtetuese për transferimin e paligjshëm të parave të pandemisë në fondin e klimës mund të ulë ritmin e rritjes së ekonomisë gjermane në vitin e ardhshëm deri në gjysmë pikë përqindjeje, tha një burim në Ministrinë e Ekonomisë së Gjermanisë.
Qeveria e koalicionit u përpoq të përfitonte maksimumin nga pezullimi i përkohshëm i tavanit kushtetues të huamarrjes gjatë krizës së koronavirusit përmes një manovre buxhetore.
Si e kryen manovrën?
Manovrën e bënë duke ndryshuar në mënyrë retroaktive ligjin për buxhetin e vitit 2021, i cili i mundësoi shtetit të merrte 60 miliardë euro hua, edhe pse në atë kohë nuk i duheshin paratë dhe do t'i përdorte nëpërmjet fondit të klimës në vitet e ardhshme financiare.
Paratë i janë transferuar fondit në shkurt të vitit 2022 dhe për vitin 2021, pra në mënyrë retroaktive, Gjykata Kushtetuese shpjegoi të mërkurën anulimin e ligjit të diskutueshëm.
Gjykatësit paralajmëruan se tavani i borxhit mund të shkelet vetëm në një situatë të jashtëzakonshme, siç është një krizë pandemike, dhe transferimi i parave në fondin e klimës nuk e plotëson këtë kusht, sipas vendimit të botuar të mërkurën.
Tani ata po përpiqen të hapin një vrimë të madhe
Koalicioni tani po përpiqet të mbyllë një vrimë të madhe në financat e shtetit pasi ata planifikojnë të përdorin paratë për iniciativat e gjelbra dhe për të mbështetur industrinë.
Ministri i Financave Christian Lindner tha të enjten se ishte shumë herët për të vlerësuar shkallën e problemit. Ministria e Ekonomisë dhe Financave nuk pranuan të komentojnë.
Një burim në Ministrinë e Ekonomisë tha të premten se vendimi do të nënkuptojë rritje më të dobët ekonomike vitin e ardhshëm.
"Sipas vlerësimeve fillestare të përafërta, norma e rritjes (ekonomike) në 2024 mund të jetë më e ulët me rreth gjysmë pikë përqindjeje për shkak të humbjes së fondeve të investimeve," tha një burim i njohur me parashikimet e ministrisë.
“Prandaj, aktgjykimi mund të ketë ndikim negativ në rritjen ekonomike”, shtoi ai.
Në tetor, Ministria e Ekonomisë parashikoi se ekonomia do të rritet me 1.3 për qind në vitin 2024.
Ministri i Ekonomisë Robert Habeck theksoi se vendimi i Gjykatës Kushtetuese mund të dëmtojë industrinë gjermane, të pengojë arritjen e qëllimeve që lidhen me ndryshimet klimatike dhe të rezultojë në zhvendosjen e vendeve të punës jashtë vendit.
“Fondi i klimës dhe transformimit duhej të siguronte kushtet për krijimin e vlerës dhe ruajtjen e vendeve të punës. Do të përdoret për financimin e prodhimit të çelikut të gjelbër, kimikateve të gjelbra, për rritjen e prodhimit të hidrogjenit dhe qelizave të baterive dhe për prodhimin e gjysmëpërçuesve për të përmirësuar sigurinë ekonomike”, tha Habeck.
"Nëse kjo rrezikohet, rrezikohen edhe vendet e punës dhe krijimi i vlerës. Eksodi i industrisë dëmton vendin dhe shoqërinë tonë", përfundoi ai.
Komisioni parlamentar shtyu për javën e ardhshme debatin për projektbuxhetin për vitin 2024, ndërsa shifrat përfundimtare do të publikohen të enjten e ardhshme.
Të enjten, megjithatë, Parlamenti miratoi një paketë lehtësimesh taksash për kompanitë e vogla dhe të mesme, me vlerë katër miliardë euro dhe që synon inkurajimin e investimeve në një periudhë të kërkesës së huaj të dobët dhe normave të larta të interesit.
